「鎖陽」唔係功夫招式，而係一種植物，據稱仲具有壯陽功效添！學名叫「Cynomorium Songaricum」，屬鎖陽科的一種植物，又名不老藥、銹鐵棒、鎖嚴子、地毛球。屬寄生植物嘅佢，寄生喺白刺（Nitraria Sibirica）嘅根部，外形呈暗紅色圓柱狀、葉子退化成鱗片狀。
據明代李時珍著嘅《本草綱目》稱：「鎖陽味甘、性溫、無毒。大補陰氣，益精血，利大便。潤燥養筋，治痿弱。」單係益精血呢點，就知對男士雄風有大補作用。而清代名醫吳儀洛所著嘅《本草從新》更稱：「鎖陽功力百倍於蓯蓉也。」蓯蓉即肉蓯蓉，具壯陽作用，而鎖陽嘅功效比佢多百倍，認真厲害！1959年出版嘅《中藥志》又謂：「鎖陽主治男子陽痿，女子不孕，血枯便秘，腰膝痿弱。」
鎖陽嘅主要成分含鎖陽萜（Cynoterpene）、熊果酸（Ursolic）、脂肪油、甾醇、鞣質、氨基酸、花色苷（Anthocyanin）、三萜皂苷、鞣質、脯氨酸等，對改善免疫系統、清除自由基等均有作用。
鎖陽主要分布地中海地區、亞洲中部、甘肅河西走廊、內蒙阿拉善盟、新疆阿勒泰、青海海西等地，從中醫學嘅角度嚟講具壯陽作用，但點服用法呢？據稱用鎖陽、肉蓯蓉、枸杞子、胡桃仁各12克，加上菟絲子9克及淫羊藿15克用水煎服，能有治療陽痿嘅作用。