早前有網民問大家，喺老婆懷胎十月期間，男士點解決生理需要？呢個問題本身冇乜問題，卻在於如果係由個女閨密問嘅話，咁男士又會點諗呢？呢位男網民就有咁嘅諗法，佢話：「我有個青梅竹馬嘅女閨密，早幾日佢問我老婆有咗5個幾月，點解決生理需要？我咪話靠手作仔同出口術，點知佢笑吟吟話可以幫到手，我真係嚇咗一跳，問佢點幫手，跟住佢就伸出對手，當晚我哋飲咗幾杯，咪當佢講笑囉，點知嗰晚我就發咗個綺夢！過咗幾日，佢打電話嚟又問我使唔使幫手，我話唔使。但問心，我對佢嘅感覺好似有啲唔同咗，其實我係咪諗多咗呢？」
洛比古：以我嘅經驗嚟睇，可以用六字真言嚟處理呢件事，就係「以不變應萬變」！唔做主動，唔當一回事，唔好有任何反應，睇定啲再處理啦！
Jane精：講真，其實所謂幾個月冇曳曳，只係個藉口嚟啫，你都話其實你老婆有幫你解決，問題只係在於你想出軌之嘛。
Zoey：搞乜都好，千祈唔好搞着你個老婆，最重要係你老婆家陣有咗，更係要明白女人有咗好辛苦，如果呢個時候你亂咁嚟，後果不堪設想呀！
芳華：我覺得你個青梅竹馬人品唔好，唔好怪我講得直，佢明知你老婆有咗，仲要喺呢個時候出擊，不論係乜嘢居心，都唔應該咁做。當然，我都希望佢只係講笑啦！