人緣好唔好，隨時會影響個人際遇，正如有啲藝人，外在條件明明好正，有樣有身材，偏偏紅唔起，令人費解。查實一個人受唔受歡迎，好可能同佢嘅性格有關，白啲講句，為人缺乏親和力，冇人願意黐埋身，又點會有運行。好似韓國模特兒李星和，除咗樣靚身材正，對人仲好親切，所以人氣先會咁高企！其實星和第一份工唔係做模特兒，當年高中畢業後，佢先後做過飲食業、醫療產品銷售同時裝設計，後來發現模特兒工作幾好玩，先決定入行。初時，星和嘅人氣麻麻，後來有前輩教路，叫佢唔好咁Cool，多啲展現親切一面，果然改變咗外界對佢嘅觀感，如今已成為炙手可熱嘅模特兒。