早前有女網民發貼文，問男女關係要發展到乜嘢程度，先至會一齊沖涼。佢有個由細識到大嘅男性好友，對方偶爾會喺佢屋企過夜，佢話：「有晚我哋喺屋企飲酒，飲到醉醺醺時，我有啲肚痛，於是去廁所解決，突然佢衝入嚟廁所話要沖涼，我未及反應，佢已經除晒衫，結果我望住佢沖涼，當佢沖到一半，就問我想唔想一齊沖，我迷迷糊糊答話好。不過大家咪諗多咗，我哋只係沖涼咋，同埋佢對住我都冇生理反應！之後，我就返房瞓，而佢就瞓梳化，第二朝我哋一齊食早餐，然後各自返工。諗諗吓，覺得呢段關係好奇怪，究竟係戀人未滿定想做戀人呢？」
悅希：我覺得你諗多咗喇！我試過飲醉酒後唔小心除咗男性好友條褲，乜都睇晒，結果咪係Friend到依家，仲有我同佢都分別結咗婚喇！
噹噹：我反而覺得佢未必當你係戀愛對象，試問有邊個男人同女人肉帛相見時唔會有生理反應呢？甚至我會有啲懷疑，其實佢嘅性取向未必係女人！
Keith：有啲人話識咗咁多年，要拍拖早就拍咗，我唔認同呢個講法，因為我同老婆由小學到大學都係同學，但係我哋一直到30歲先至拍拖，所以感情嘅嘢話唔埋嘅。
煙夢：其實問題好簡單啫，你鍾唔鍾意佢先？我覺得有個方法可以試吓，就係一個月唔搵佢，睇吓你掛唔掛住佢，佢又有冇掛住你，咁咪清楚晒啦！