半夜突然覺得肚餓，咪走去搵嘢食囉，但如果男友總係深宵時分，性慾零舍旺盛嘅話，咁就真係幾煩惱，難怪呢位女網民會咁忟，佢話：「因為工作關係，我每晚都會好早瞓，而男友就會夜瞓啲，問題係好多時我瞓得最稔嘅時候，男友突然伸隻手過嚟搞搞震，令我扎醒之餘，完事後仲要去沖涼，結果上番床就瞓唔着，眼光光等天光，搞到第二日冇精神做嘢。我同男友提議喺周末嘅日子先曳曳，但佢就話性慾呢家嘢唔可以控制得到，話嚟就嚟。唔知大家有冇辦法，可以令佢唔好再喺夜深時候搞搞震呢？」
Queen： 方法好簡單啫，就係你瞓覺時閂房門囉！一來可以瞓個安樂覺，二來又等佢知道你唔係講笑，而係真心唔鍾意，真係要堅持打擊佢呢種半夜搞搞震嘅行為呀！
夜思： 你男友呢種行為真係好唔尊重人，佢明唔明性愛其實係要你情我願先至開心，佢想做就搞醒你，當你係乜呀？
莎莎： 我覺得你可以嚟個反客為主，即係瞓覺前先榨乾佢，當然方法有好多種，總之就係搞到佢腳軟，久而久之佢見你一埋身，就已經嗌怕怕。
寶妮： 雖然喺半夢半醒之間曳曳嘅感覺係幾過癮，但如果男友經常係咁嘅話，其實都唔係人人頂得順。好好同佢傾吓，等佢知道你真心唔Like！