有樣貌，有身材，仲要有口才，莫非係選港姐？原來家陣要當上人氣模特兒，除咗外形要夠出眾外，仲要Talk得，韓國模特兒宋怡娜就係表表者。
話說阿妹對賽車運動有着濃厚興趣，一直夢想成為賽車運動員，卻意外地投身模特兒界，結果愈做愈有滿足感。不過，命運就係咁有趣，正當佢忙於做攝影模特兒之際，竟然有機會兼職做賽車女郎，簡直係開正佢嗰瓣。由於佢對賽車運動有深厚認識，結果做埋客串主持嘅工作。咪睇佢平日好少講嘢，一講到賽車就眉飛色舞，搞到把口愈嚟愈Talk得，仲喺2009年舉辦嘅賽車女郎大賽中獲最佳主持殊榮。近年，阿妹做埋美容KOL，不但為大家介紹新產品，更幫產品做代言。果然，有口才，搵錢機會都零舍多過人！