點樣先配得上「女神」呢個稱呼？相信好多人都會同意「樣靚身材正」係基本條件吧，而兩者都可以靠後天改造嚟實現，好似德國有位網紅為咗一個「靚」字，不斷整形，樣貌索唔索就見仁見智，但身材絕對係魔鬼級數，加上經常上載性感照派福利，人氣與日俱增，之但係呢位阿妹依然好困惑，點解呢？
好多人因為貪靚，不惜代價，德國模特兒Yvonne Bar就係表表者，自7年前開始整形，先後做過隆臀、修臉、豐唇等手術，成功將AA罩杯升Cup至H罩杯，令身材變成魔鬼級，難怪愈嚟愈多男士視佢為女神。據Yvonne解釋，自從2012年喺邁阿密見到唔少身材火辣嘅索女後，就下定決心要整形，而且接受手術後，確實吸引咗好多男士埋身，加上頻頻喺網上分享性感自拍照，好快變咗IG紅人，粉絲數字多達101萬，收入亦隨之豐厚起嚟。不過，女神都有苦惱，皆因好多男士之所以主動埋身，純粹係為咗曳曳，最慘係當佢對某男士有好感，對方又會被其火辣身材嚇怕，令佢覺得真愛難尋，難怪佢咁苦惱喇！
現代男女關係可以有幾混亂，睇怕都及唔上美國呢兩對夫妻吧！話說喺田納西州有對夫妻叫Matt同Carmen，去年一齊去學跳搖擺舞（Swing Dance），點知上咗堂之後，分別愛上舞蹈教練兩夫婦Keith同Brooklyn，而咁啱佢哋亦對呢兩公婆有意思，於是四個人就開始約會，更奇情嘅係，呢兩對夫妻喺第一次約會已探討同居嘅可能性。咁都未算離譜，原來Matt同Carmen已經有細路，分別係6歲大嘅兒子Kieran同3歲大嘅女兒Ellie！經過幾次「約會」後，兩對夫妻決定同居，仲經常一齊行街添，唔知兩個小朋友點睇父母嘅四仔關係呢？
日本漫畫《ONE PIECE》嘅人氣女角色娜美，係唔少巨乳女Coser愛好挑戰嘅角色之一。不過，娜美嘅賣點唔單止有巨乳，仲有活潑嘅性格，要神還原呢一點並唔容易，難怪早前日本寫真界新星櫻田愛音嘅Cosplay相一出，即成為網絡熱話。呢位喺2001年出生於琦玉縣嘅索女，去年先至出道，但憑住「打破埼玉盛產貧乳傳說嘅G奶」而受到網民關注。論身材，擁有35G巨乳嘅佢，絕對有條件扮演娜美呢位女角色，加上一身青春氣息，感覺更加係入型入格。
撰文：魂