女人總會有幾日唔方便，作為暖男又好，禮貌上或尊重對方都好，都唔好打擾對方忟憎嘅心情，更唔應該用佢嚟作為搵囡囡嘅藉口。呢位女網民就有咁嘅遭遇，佢話：「我每次月事來臨嘅時間都比較長，約10日左右，但係男友天生性慾強，以往我會手口並用幫佢解決，不過時間耐咗，我覺得好煩厭，唔係討厭咁做，而係冇心情，所以拒絕咗佢好幾次。早前我發現佢手機有啲陌生囡囡群組，一睇之後覺得唔對路，因為寫咗價錢，明眼人都知佢喺出面做乜啦！我接受唔到，點知佢話咁做好過搵啲前度嚟解決喎，我嬲到同佢冷戰到今日，佢亦冇搵過我。開始諗係咪我太過嚴厲呢？但我又真係覺得佢咁做唔啱，大家認為我係咪過分咗？」
Belly Lau：你一啲都唔過分呀，好明顯係佢嘅道德觀同價值觀都出現問題啦！乜嘢召妓好過搵前女友解決，佢根本就係鹹濕！正宗鹹濕賤男！講完！
好男易走 ：雖然話忠言逆耳，都知你一定聽唔落，但既然你問得出，我就姑且答你啦！你「親戚」就算嚟一世又點呀，佢都冇理由用呢個做藉口嚟成為搵女嘅理由，佢唔係為性慾而存在o架？
尖釘路飛：從男人角度睇，可能佢真係唔做唔得呢？我就覺得畀錢搵女冇問題，只要唔係成日去就得啦！不過搬埋前度出嚟，呢點就真係唔撐佢囉！
Pinky Ma：其實你係咪得十幾二十歲咋？問得出呢個問題，睇嚟你對感情都唔係好成熟。好明顯佢係呃住你喺外面搞搞震，跟住再藉口嚟掩飾。睇清楚問題本質，你應該知點做啦！