生理反應呢樣嘢總係令人有意料之外嘅感覺，好似日本有男網民買咗壯陽用品，最後竟然變成熊本熊有生理反應！另外，有個關於潮吹嘅調查，發現女士唔係咁受落神之手所引發嘅潮吹。不過講到最可悲，莫過於有寫真女優因為不良習慣損害雙腿，搞到連企都企唔穩。
經常「腿張開」有機會出現後遺症？所謂「腿張開」即係雙腳大字形擘開，仲係唔明嘅話不妨搵隻日本AV研究一下。不過呢位出現後遺症嘅女主角，其實同AV冇關係，事關佢係日本八頭身長腿寫真女優岡田紗佳。
事緣佢擔任日本健康綜藝節目《名醫的THE太鼓判！》嘅嘉賓，表示自己最近唔可以長時間站立，每次外出都好想搵地方坐低同挨吓，經診斷下發現佢雙腳唔少微血管都消失咗，於是醫生就帶同攝製隊睇吓係咪同佢嘅生活習慣有關，結果發現原來岡田紗佳坐喺梳化打機時有個習慣，就係鍾意擘大對腳，一隻腳晾喺梳化扶手，一隻腳搭喺茶几，坐姿零儀態，但卻好香艷。此外，佢瞓覺時亦鍾意搭對腳喺床頭玩「V腳」，連刷牙亦會戙高隻腳，結果令微血管痿縮而損害雙腳功能，醫生教導阿妹加強下半身嘅肌肉，就可以改善問題。
係咪只得男士對「潮吹」有興趣？咁女士又點睇呢？日本官能小說家大泉理香就住呢個問題喺網上進行問卷調查，結果130名受訪女士中，有28%嘅女士對潮吹有興趣，雖然喺呢班女士當中唔係全部都有潮吹經驗，但係佢哋卻絕大部分都認為，相對手指引發嘅潮吹，始終都係啪啪啪而引發嚟得舒服同安心。
有部分受訪女士覺得激烈嘅手指刺激動作，有機會傷害到身體，所以都係自然地引發最好。正係因為擔心身體受傷，所以有唔少女士對潮吹冇興趣，亦拒絕開發呢種生理反應。不過呢班反對者仲有其他理由拒絕，有人認為搞到床單濕晒，事後要換床單好麻煩，更有人認為可以喺浴室玩，但去到浴室玩花灑已經好正，做乜仲要玩潮吹呢？
網絡上經常出現唔少爆笑嘅產品用後感，大家當係參考文章，或想食花生兼落井下石都冇問題，之但係好似呢位日本網民嘅壯陽小膠囊用後感，卻成為網絡熱話。呢款小膠囊係佢同太太去熊本旅行時，於「驚安之殿堂」購買，佢話：「食咗3粒之後，一個小時內仍然冇反應，仲同太太喺酒店房睇戲同傾偈，點知兩小時後，慾火愈嚟愈旺盛，並開始同太太調情，繼而再進一步。」完事後，佢先留意到小膠囊原來係具有提升持久力作用，因此兵器到翌日朝早仍然非常硬朗。
對於產品嘅結論，佢就話：「畀大家一個忠告，千祈唔好旅行時服用，因為喺旅程中我見到熊本熊都有反應……以上內容全部都係事實，但請理解藥效因人而異；仲有要再向所有熊本熊嘅粉絲道歉，對唔住我對熊本熊硬直了。」
撰文：魂