如果話有人喺分手之後，仲想同對方保持炮友關係，大家覺得呢個人係男性定女性呢？咁樣問得梗係有古怪啦！呢位男網民稱三個月前同女友分手，點知有晚卻收到對方嘅短訊，佢話：「我真係嚇咗一跳，因為我哋並唔係和平分手，理由係佢有另一個男人，詳細唔講咁多，問題係WhatsApp嘅內容好古怪，大意係想同我發展炮友關係，每個星期出嚟見面一次。於是我打電話畀佢，佢話覺得喺床上同我好合拍，所以有咁嘅提議，仲話如果我唔OK就算。雖然我個心唔想，但係身體最誠實，因為佢身材真係幾正，到底應唔應承好呢？」
直髮有理：Ex咁表態，一定有古怪！我覺得呢個一定係個局嚟，都唔知佢係咪同現任男友夾埋有乜陰謀，你咪因此而做錯事呀！
青山gogo：你有冇嘢畀人哋呃先？冇嘅話又有乜嘢所謂，反正又唔係你提出，同時你又有WhatsApp對話做證據，證明係佢提議嘅，到時佢男友發現咗，咪由佢哋解決囉。
YuTong：佢係咪玩你o架？你都話分手過程唔係咁和平，會唔會係佢懷恨在心，諗住整蠱你呢？不過你先至係當事人，當中嘅魔鬼細節係你最清楚。
Stephen：有食唔食，罪大惡極！我真心覺得食得唔好嘥。不過話又講番轉頭，其實佢係咪有咗先至搵番你o架？