日本嘅「陪睡屋」服務，當初有唔少人以為係風俗服務之一，點知原來只係齋陪瞓，而最近呢種服務又嚟個進化，吸引唔少麻甩佬幫襯。另外，有位日本女作家因為一句說話，令人們對比卡超嘅邪念成為話題，究竟發生乜嘢事呢？
去年日本秋葉原出現一間名為「陪睡屋」嘅店舖，客人同女服務員一齊瞓喺床上，最多嘅身體接觸只限瞓喺囡囡嘅大髀同臀部。最近池袋就出現咗一間以「新感覺擁抱」為名嘅服務店「玉子以上小雞未滿」，究竟佢同陪睡屋有乜分別呢？據稱佢哋嘅服務以擁抱為主，並且分為15分鐘嘅體驗套餐、25分鐘嘅一般套餐以及35分鐘嘅豪華套餐。入到房間後，女服務員會先同客人嚟個擁抱，跟住再按客人揀選嘅套餐提供錫面、膝枕、臀枕、按摩等服務，此外客人仲可以指定女服務員着乜嘢制服。當服務完成後，女服務員會同客人再嚟個擁抱。另外，客人可以揀選逆向服務，即係掉轉為女服務員按摩或瞓大髀。自開業以嚟，深受大叔歡迎，同時佢哋好鍾意玩逆向按摩，因為可以令佢哋變得冷靜同有療愈感。
早前美國有調查發現，有唔少男女喺性愛過程中，發生過令人難忘嘅經歷，當中最多女性發生嘅係喺中途放屁，而男士則係喺激戰期間瞓着咗。而網站Reddit就呢個話題，讓網民分享自己嘅難忘性愛經歷，有男網民表示同初戀女友喺屋企嘅單人床上啪啪啪，由於一邊床係貼牆身關係，當佢想讓女友吹奏一曲時，點知就狠狠地撼頭埋牆，結果暈咗。另外，又有一位男網民稱，22歲嘅時候同女友到海邊一間酒店度周末，朝早梗係嚟番場晨操啦，點知房門突然被一位清潔女工打開，女友即刻將佢推開並匿入被內，而佢則赤裸裸企喺清潔女工面前，場面超尷尬！經過呢次之後，佢以後都會確保房門鎖咗先至敢啪啪啪。
源自日本ACGN文化中嘅「萌」字，泛指令人產生愛意，包括喜愛、可愛等嘅感覺，當日本評論家兼作家岩渕潤子討論到萌同比卡超關係時，卻引嚟日本網民嘅熱議。話說早前岩渕潤子喺網上以日文「萌え」進行搜尋時，出現英文「Neoteny」，中文解做幼態持續，意思係指一個物種，將幼年時特徵保留到成年期嘅現象。對於呢個解釋，岩渕梗係覺得唔啱啦，佢就話：「文中舉例萌嘅特徵包括大眼睛、紅臉頰……我諗最符合嘅就係比卡超喇，只係應該唔會有人對比卡超有性幻想囉！」言論一出，立即引起網民熱議，紛紛留言：「只要上網搜尋會發現有好多相關題材嘅四仔！」「的確有唔少相關嘅18禁插畫及同人誌。」其實佢哋又冇講錯喎，美國四仔經常惡搞比卡超，搵脫星扮演真人版，但係好唔好睇則見仁見智。
撰文：魂