就嚟到光棍節，又係一眾光棍男反思自己點解溝唔到女嘅日子，問到光棍男點解會一直單身，好多時都聽到佢哋會話：「冇機會識女仔」、「家陣搵已經嚟唔切」、「拍拖好麻煩」等，結果變成真正溝唔到女。日本女作家大泉理花喺《女人就喜歡男人這樣》中，就話畀光棍男知唔好再用呢啲理由做藉口，因為佢哋內心明明就係好想識番個女朋友。書中指出喺現今呢個時代，男人喺拍拖上相當有利，亦係識女友嘅好時機，而每個女人對喜好嘅男士都有唔同，因此唔會有唔受歡迎嘅男人，於是以女性嘅角度出發，話畀光棍男知應該做乜嘢先至會有異性緣，有乜嘢事唔做都無所謂，而最重點嘅係喺第幾次約會後，先至可以同對方啪啪啪，上到床後男士又應該點樣做，同埋女性會在意男士邊啲關鍵點。呢本書務求令一眾光棍男唔單止可以成功脫單，仲要令大家成為一位唔使勉強自己扮型，亦唔使扮可憐嚟獲得女性關愛嘅男人。