外國嘅情慾小說有好多，因此對初次接觸呢類成人小說嘅讀者嚟講，最好就係從名家作品入手，好似J.D. 羅勃就係人氣極高嘅情慾小說家，其著作《勾情謎蹤》一定唔可以錯過。
故事以一位叫依芙嘅女主角為核心，佢係一位女偵探，只對古怪嘅案件有興趣。有日佢接到一宗關於女子墜樓嘅案件，去到現場後發現事發單位內有燃燒緊嘅浪漫燭光，播放住優雅嘅音樂，同埋床邊鋪滿一地嘅鮮花瓣。浪漫嘅環境令所有人以為只係一宗普通嘅案件，但係依芙卻發現案中女子嘅真正死因，係服用過量罕見昂貴嘅催情禁藥。
喺依芙嘅追查下，發現女方喺網絡聊天室結識兇手，但卻仍然搵唔到疑犯，而且兇手唔止手法不斷進化，心態亦變得更兇殘。為咗追查真兇，佢決定以身犯險，同危險嘅情慾關係只有一步之遙。究竟依芙能否喺下個受害人出現前，或者自己成為受害人前，將兇手繩之於法呢？
書名：《勾情謎蹤》（Seduction in Death）
售價：約HK$80
撰文：魂