愛恨交纏嘅情慾故事固然令人有追睇嘅欲望，只係睇得多未免有過於沉重嘅感覺，偶爾嚟番套輕鬆嘅情慾喜劇，總會令人有意想不到嘅滿足感，好似情慾小說家羅莉塔‧雀斯嘅情慾喜劇小說《情挑天鵝絨》，正正係其中一個人氣之選。故事發生喺19世紀，當中嘅女主角麗妮因為兩位姐姐相繼結婚關係，所以佢惟有接掌專門製作貴族女裝嘅羅氏女裝苑。憑住佢理智務實及精於計算嘅性格，樂於放棄浪漫愛情，而將生意做得愈嚟愈好。
不過啱啱回國嘅里斯柏恩侯爵柏賽門卻唔係咁諗，對於呢位冷傲美人，有種直闖對方情感禁區嘅衝動，務必要見識對方為愛情而瘋狂嘅模樣。心水清嘅麗妮早就估到對方嘅諗法，決定要趁呢個機會教訓對方，於是同對方協議，以表妹費歌蒂能否成為社交界紅人為賭局，若然成功嘅話對方要知難而退。本嚟諗住透過呢個機會，既可宣傳公司嘅服飾，又能喺對方身上狠狠刮一筆。不過佢卻諗唔到，自己竟然因為對方嘅魅力，令精於計算嘅自己慢慢墮入情慾嘅陷阱中。
書名：《情挑天鵝絨》
售價：約HK$85
撰文：魂