正所謂「你的樣子如何，你的日子也必如何。」意思係話生得一副靚樣，日子會過得好啲，生得醜樣就唔使旨意有好日子過。其實生得唔靚係咪真係咁坎坷呢？小弟就覺得未必，因為前路始終都係要靠自己雙手去開創，生得靚仔靚女如果唔肯努力一樣係廢人，而喺日本藝能界有好多醜小鴨最後變成萬眾矚目美人兒嘅例子，最近推出個人寫真集嘅須田亞香里就係其中之一喇。
亞香里出道9年，喺呢幾年裏阿妹可以話係逆境求生，因為佢成日被人批評生得醜樣，幸好亞香里充滿正能量，更加將批評視為磨練以及奮鬥嘅原動力，令佢發奮向上，結果喺「AKB48第53張單曲世界選拔總選舉」中以154,011票數獲得第2名，連續三年於AKB總選舉中成為「神7」之一！另外，阿妹以個人奮鬥嘅經歷推出自我啟發書籍《自卑力～為甚麼能爬出逆境？～》添！最近亞香里推出寫真集《可愛くなる方法》，當中大家可以感受到阿妹經磨練而散發出攝人魅力，呢種魅力來自雪白又婀娜嘅胴體之外，亦來自親切、可愛及真摯嘅笑容，正面對人生苦惱嘅朋友欣賞一下必定覺得精神一振，了解埋亞香里嘅故事仲會覺得人生其實充滿希望添！
書名：《可愛くなる方法》
售價：約HK$138
撰文：賢