夏日炎炎齊歎例之泳池

名聲遠播

講到夏日暢泳，小弟比較鍾意去政府轄下嘅公眾泳池，一來夠晒安全，事關實會有救生員睇住個場，二來，天氣炎熱會令海水溫度提升，海水中細菌活躍度自然增強，而泳池一般都會用氯氣消毒殺菌，相較之下衞生程度較高。提到泳池，小弟最想去嘅係位於日本新宿一幢豪華公寓入面嘅泳池，此泳池名聲遠播，被日本人稱為「例之泳池」，台灣人則稱佢為「萬惡泳池」，點解？呢個位於東京都新宿區，總樓層平面面積達614平方米嘅Hanazono Room公寓入面嘅室內泳池，乃係知名AV拍攝勝地，可以大膽講句10部有關泳池激戰嘅AV作品，有8部都係租用呢個泳池嚟拍攝，所以呢個泳池不知承載過幾多男女優嘅激情，好似AV天后吉澤明步、小島麻奈美等知名女優都曾經喺呢個泳池同男優砌到水花四濺。

親身了解

正因為呢個泳池拍過咁多AV，所以早前有調查發現，約1,300多名受訪者當中，有13.8%嘅受訪男士認得呢個泳池，亦有另一個調查發現，眾多有睇AV習慣嘅受訪男士當中，逾9成認得呢個泳池，正因為咁，唔少男士好想一睹泳池嘅「風采」。早前，有位名叫「izm_11」嘅網友就有幸去到Hanazono Room工作，之後佢撰寫咗一篇文介紹「例之泳池」，佢話自己透過電話查詢，了解到租用有泳池嘅樓層每3小時收費5萬日圓（約3,700港元），若然只租用泳池就只需要3萬日圓（約2,200港元），不過由於泳池嘅空間相當狹小，如果工作人員多的話，租晒該層嚟拍攝會比較方便。之後網友就親身到達現場，佢表示乘搭東京地鐵丸之內線，喺新宿御苑前站2號出口徒步5分鐘就到達Hanazono Room公寓，而「例之泳池」則位處公寓9樓。到達目的地之後，網友發現泳池四周都冇電源提供，所以提醒租客有需要用電的話，就要預備長達10米嘅電線喇。至於網友今次去拍乜？佢就話無可奉告，但係佢就補充話「例之泳池」其實唔單止用嚟拍AV，好多水着攝影會及聚會都會喺呢度舉行，叫大家唔好成日都咁心邪喎。

趣聞甚多

關於「例之泳池」真係大把古仔講，2004年開始有人租用泳池嚟拍攝AV之後，名氣愈來愈盛，有人表示Hanazono Room係老牌男演員石坂浩二嘅住所，不過喺2016年嘅時候石坂浩二就表示已故名導演，與黑澤明、木下惠介、小林正樹並稱日本影壇四騎士嘅市川崑曾經住過喺公寓地下嘅一層。由於「例之泳池」的確係「淫」聲遠播，所以每次喺正經嘅電視節目出現都會惹來市民熱議，例如喺2013年知名女演員石原聰美喺「例之泳池」拍攝電視劇《世界奇妙物語 春季特別編 假婚》，劇集播出街之後就有好多觀眾取笑石原聰美同AV界拉上關係喇。另外，《幪面超人Fourze》亦有一集講述有怪人現身「例之泳池」，又成功惹來市民竊笑一番。

撰文：賢