南韓模特兒界有唔少索女，想喺當中突圍而出，單憑迷人嘅樣貌同火辣身材並唔夠，而點樣先至可以令大家對自己留下深刻嘅印象，係每位新進女模必然面對嘅問題。至於今日介紹嘅宋丹菲，卻憑住一個獨特嘅方法而火速冒起。
為咗可以營造出與別不同嘅印象，唔少南韓模特兒都會刻意打造自己嘅背景，等自己嘅成長經歷睇起嚟特別啲。不過呢個問題對宋丹菲嚟講絕對唔係一個問題，事關喺南韓光州廣域市出生嘅佢，因為父母喺日本營商關係，所以佢喺手抱之齡就已經跟隨父母移居日本，喺日本定居咗10幾年，直至高中畢業後，先至返回南韓位於光州嘅松源大學入讀應用藝術系，主修舞蹈，因此佢唔單止精通日文，更通曉各種舞藝流派，包括現代舞、嘻哈、芭蕾舞、爵士舞等。
既然宋丹菲如此精於舞藝，點解又會投身模特兒界呢？原來早喺日本就學嘅時候，佢曾經投考過藝能人選拔試，但因為日文唔夠標準關係，結果未能入選。佢返回南韓後，喺朋友介紹下兼職做攝影模特兒，起初佢只想有多啲社會工作經驗，同時豐富自己嘅履歷，加上佢苦練日文，希望將來有機會再戰日本藝能界。不過佢估唔到做咗兼職攝影模特兒後，竟然鍾意咗呢份工作，同時喺業界累積咗唔少人氣。原來熟習舞藝嘅佢，有感一般模特兒甫士太過單調，於是佢靈機一觸，將舞蹈融入甫士當中，結果獲得攝影師嘅好評，加上一副前凸後趷嘅火辣身材，令佢獲得相當高嘅人氣。
2012年宋丹菲喺光州舉辦嘅車展上，首次以車模身份登場，佢表示當時由於太過緊張，故此表現一般。不過佢亮麗嘅外形，吸引模特兒事務所留意，問佢有冇興趣轉為職業模特兒，其實當時佢早已有興趣喺呢行作長遠嘅發展，難得有事務所幫佢計劃將來，所以佢便一口答應。初時以攝影模特兒及商品展銷模特兒工作為重心，及至2014年時才以車模身份喺大型活動上登場，經過一段時間磨練後，宋丹菲出席大場面表現得信心十足，亦將舞蹈糅合甫士嘅獨門秘技展現出嚟，加上過人嘅魅力，令佢好快喺車模界闖出名堂。有見及此，事務所安排佢擔任賽車女郎，穿着性感賽車女郎制服示人，將激凸嘅上圍展露無遺，配合一對修長美腿，更係艷驚四座，成為攝影師爭拍嘅焦點。
宋丹菲嘅人氣不斷攀升，模特兒事務所就食住個勢，推薦佢參加「第3屆韓國賽車模特大賽」，而佢亦憑住出色嘅舞藝及誘人嘅魅力，最後喺比賽中奪得最佳才藝獎，經過呢次比賽後，宋丹菲嘅人氣攀上頂點。人紅咗，宋丹菲嘅私生活自然成為唔少人嘅八卦對象，有傳媒問佢希望搵邊類型嘅男友，佢笑稱最鍾意成熟嘅中年男士，若然係型男嘅話就可以打動到佢喎。
簡介：問到宋丹菲恨唔恨拍拖時，佢坦言自己嘅戀愛細胞已經冇晒，現時只係希望能夠專注喺模特兒嘅工作，而未來更希望能夠喺藝能界發展，終極目標係喺東京巨蛋舉行演唱會。如果大家想了解佢多啲，就要Click入呢個網站喇！
網址：http://cafe.daum.net/songdanbee
出生地：光州廣域市
身高：170cm
三圍：36-24-36
撰文：魂