早前日本有位醫生喺綜藝節目上表示，老人家諗多啲鹹濕嘢有助提升判斷力同幹勁，雖然唔知對其他年齡層嘅人嚟講，係咪都一樣有效，只知道諗鹹濕嘢變得有意義。如果想測試自己係咪邪念十足，可以睇吓今次關於鱈魚子引發出嚟嘅遐想，就知自己嘅邪念水平去到邊。不過講到邪念，就及唔上英國嘅裸體女傭咁邪惡喇！
美國有調查指出，男士平均每日有19次性幻想，可能女士們會話男人好鹹濕，但原來鹹濕都有好處o架！早前日本綜藝節目《上沼‧高田的Kugizuke！》以老人嘅大腦保健為主題，討論點樣可以令老人嘅大腦保持清醒，皆因老人經常為咗小事而大發脾氣，好似出電梯要順序、燒雞要落乜嘢調味料等，總會因為意見不合而同人發生爭拗。參與節目嘅腦科醫生就話，老人之所以有咁嘅情況，係因為佢哋嘅思考停滯，如果唔加以改善嘅話，有機會出現腦退化症。如果老人唔想出現咁嘅情況，最好就係食多啲豆腐同埋諗多啲鹹濕嘢。嘩！食豆腐都算合情合理，但係諗鹹濕嘢都得，唔通真係唔滾唔知身體好？大家唔好誤會，醫生係話諗多啲鹹濕嘢，而唔係話去滾！至於理據係因為豆腐、納豆、味噌等呢類大豆製品，可以幫助身體製造「血清素」，而諗鹹濕嘢則可以令人產生「多巴胺」，前者可以促進老人嘅判斷力，後者則可以令老人有更多幹勁。不過醫生就冇話對年輕人嚟講有相同作用，若然有嘅話，咁諗鹹濕嘢又好似幾順理成章喎！
如果有人將「性器官」嘅相片放上網開心「些牙」嘅話，網民嘅反應通常會質問點解要放啲咁猥瑣嘅嘢上網，但其實睇真啲，只不過係食物或植物嚟咋，大家咪心邪呀！日本有位叫Sushio嘅網民，早前喺Twitter上分享咗一張惹嚟熱議嘅照片，相中有一碗白飯，當中有一條狀似男根嘅東西，實在引爆大家嘅邪念，究竟呢樣嘢係乜東東呢？答案就係鱈魚子喇！煮熟咗嘅鱈魚子唔單止外形勁似男根，連紋理都似到十足，難怪網民有強烈嘅反應。有網民話見到鱈魚子末端散落嘅魚卵，令佢胯下有一種破裂嘅痛楚感覺，亦有人稱呢種食物最啱作為小男孩成長嘅祝福食物。
除咗網民紛紛留言之外，亦有唔少網民以圖片展現出大自然嘅奇妙，同呢條鱈魚子有異曲同工之妙，例如有網民分享咗一張芋頭嘅相片，呢個芋頭嘅外形唔單止勁似男性器官，連兩粒波子都有埋，加上好似毛髮嘅芋頭根，真係好有畫龍點睛嘅效果。另外，又有網民分享咗佢屋企隻狗仔嘅照片，毛茸茸嘅身形加上趴喺地嘅睡姿，驟眼睇以為係男根咕𠱸。睇到呢啲照片，究竟係大自然嘅巧合神奇啲，定係網民嘅邪念多啲呢？
隨住經濟變化，家陣又點止得72行職業呢？好似英國有間叫做Naturist Cleaners嘅傭工公司，直譯中文嘅話，叫做「天體主義清潔工人」，相信大家都知道呢間公司係提供乜嘢服務。據呢間清潔公司嘅行政總裁Smith表示，喺2016年成立公司嘅時候，乜嘢類型嘅裸體傭工都有，有男有女亦有老有嫩，但喺佢心目中，一直認為青春又貌美嘅女傭最受歡迎。點知經過兩年嘅經營後，卻發現現實並非如佢所預料，反而係熟齡嘅女傭最受歡迎，而所謂熟齡，即係38歲以上嘅女性。據分析指，呢個年齡層嘅女性之所以咁受歡迎，係因為佢哋唔單止身材好，同時佢哋亦較為細心，雖然有樣有身材好吸引，但係作為女傭，始終係以清潔工作最為重要。
至於邊類客人會搵呢啲裸體女傭上門打掃呢？據Smith表示，佢哋嘅客戶幾乎都係男性，年紀比較大，多數屬於中產人士，當中更不乏年薪過百萬英鎊嘅男士。由於客戶不乏有頭有面之人，故此Smith表示旗下女傭都需要簽訂保密協議，唔能夠透露自己曾去過邊度提供清潔服務，以保障客戶嘅私隱。至於收費方面，由於呢間公司係按唔同客戶嘅情況嚟收費，換言之未試過真係唔知要幾多錢。
撰文：魂