今次同大家介紹一本嚟自日本嘅作品，由日本女作家平日久美著作嘅情色小說《霸道少東偽戀契約》。平日久美嘅來頭一啲都唔小，曾喺第6回純愛蜜糖戀愛小說比賽獲獎，而佢其後推出嘅小說《戀愛麵包師 希望乞全部吃掉》、《戀愛在化妝後》等，憑住純愛及情慾內容而大受歡迎。
《霸道少東偽戀契約》以情傷後再次戀愛為題材，講述女主角亞莉沙因為被前男友傷害，感到身心俱疲，決定唔再戀愛，自此之後佢唔再打扮，並訛稱有位喺外國嘅男友，拒絕各種聯誼及相睇活動。正當亞莉沙習慣咗呢種平穩生活之際，卻被新調職過嚟嘅少東航一眼睇穿，而被家族迫婚感到煩惱嘅佢，正想搵一個唔使談情嘅異性，同佢假扮一對戀人。喺軟硬兼施下，亞莉沙答應少東航為期4個月嘅偽戀人合約，不過兩人卻戲假情真，更發生肉體關係，究竟最後佢哋會否有情人終成眷屬呢？
書名：《霸道少東偽戀契約》
售價：約HK$70
撰文：魂