好多人渴望得到愛情，卻同時希望能避免被情所傷。美國天后級成人小說家Lisa Kleypas擅長將色慾元素加入愛情小說中，呢本作品《謎情夢幻湖》就能夠充分體現出嚟喇。故事講述建築師男主角艾力克斯經常借酒消愁，因為佢啱啱同老婆離婚，而分產協議幾乎完全榨乾佢所有身家，若然冇晒錢嘅話，佢嘅夢幻湖建築計劃就會被無限期擱置。呢晚佢如常喺酒吧飲酒，眼前突然出現一個穿着飛機師皮褸嘅鬼魂，艾力克斯感覺到自己同對方產生某種聯繫，而鬼魂就求艾力克斯幫忙搵出自己嘅身份，喺對方嘅纏擾下，艾力克斯變得更加虛弱，直到佢遇見到經營甜品屋，擁有古典外貌嘅金髮美女卓伊，對方唔單止外形迷人，佢製作嘅甜品更係有療愈效用，尤其係柑橘同藍莓甜品，每一啖都令艾力克斯有被關懷嘅感覺，甚至有被撫摸全身嘅快感。卓伊雖然樂於為艾力克斯製作甜品，但卻唔知點樣可以撫平對方嘅愛情創傷。為咗可以令艾力克斯重獲新生，佢決定拜託對方整修位於夢幻湖邊嘅屋企，當艾力克斯入屋一刻，鬼魂產生無比嘅渴望同痛苦，而卓伊患有腦退化症嘅祖母艾瑪，或者知道鬼魂嘅身份。