人人都有邪念，明明係一件泡芙，竟然有人誤以為係男性生殖器官，更掀起網民熱議。不過有啲嘢又實在令人禁不住心生邪念，好似英國網紅拍片製作菊花朱古力，過程相當香艷，之但係有冇人敢試食呢？另外，法國有間性愛娃娃俱樂部，有人就批評佢同妓院一樣，唔知大家又點睇呢？
朱古力係唔少人至愛嘅零食，但係有種朱古力，作為朱古力控都未必夠膽食，就係由英國朱古力生產商Edible Anus推出嘅同名朱古力「Edible Anus」，佢與別不同之處，係喺菊花上倒模然後製作而成。生產商稱由於人人嘅菊花形狀都唔同，透過「Edible Anus」可以打破文化隔膜。不過一直以嚟都有唔少人懷疑，「Edible Anus」係咪真係用真人菊花倒模而成呢？最近英國網絡紅人Tracy Kiss就話畀大家知喇！
身材火辣嘅Tracy Kiss，最近喺YouTube分享同Edible Anus合作點樣炮製自家菊花朱古力嘅過程，影片一開始見到佢走入Edible Anus嘅工作室，然後瞓上一張類似睇牙醫嘅床上，將下半身抬起，跟住倒模師用油灰塗喺菊花上，當油灰乾透後，便將油灰取出，再用石膏模同矽膠取模，做好Tracy Kiss嘅菊花模後，便可以製作個人限定嘅菊花朱古力。搞咁多嘢係為乜呢？目的就係宣傳為客人度身訂造菊花朱古力嘅服務。呢種朱古力對菊花迷嚟講可能有一定吸引力，但係對於英國網民嚟講反應卻不一，有人回應話好唔衞生，根本食唔落口，亦有人嘅留言更激，表示寧願畀核武轟炸算了。話說回來，你又夠唔夠膽食Tracy Kiss嘅菊花朱古力呢？
日本人鍾意甜食，所製作出嚟嘅甜品唔單止甜到爆，外形亦相當吸引，若然加上「限定」二字嘅話，就更係引到人流晒口水！不過呢類甜食嘅精緻外形，對於一啲心懷邪念嘅人眼中，卻變成鹹濕嘢囉！
話說日本嘅綜藝節目《已是午間了！》早前播放一套以羽田機場嘅早餐為題嘅特集，其中介紹東急羽田卓越大飯店嘅「飛機泡芙」，每日限定製作最多5個，泡芙長約20cm，外形參考波音787飛機製作而成，機翼更寫有「787」嘅阿拉伯數字，而泡芙中間夾有新鮮士多啤梨、鮮忌廉同吉士忌廉，賣相吸引加上每日限定，故此需要提早兩日預訂，否則就算排隊都買唔到。
節目嘅介紹講到有聲有色，點知個攝影師拍攝呢個「飛機泡芙」時卻係色氣十足，唔知攝影師係有意定無意，竟然將「飛機泡芙」拍到好似一條巨根放喺回力鏢上面咁，而呢個畫面播出，立即引嚟網民熱議，唔少網民坦言無論點睇，都似足一條巨根，甚至有網民進行P圖，索性P出一條巨根。不過亦有網民平反，認為只要換個角度嚟睇，其實佢真係架好萌嘅飛機形泡芙嚟o架！
今時今日嘅性愛娃娃愈出愈逼真，質感及活動性愈嚟愈似真人，搞到原本對呢種情趣玩具冇興趣嘅男士，都開始改觀。有見及此，早前法國人Joaquim Lousquy喺巴黎第14區開設全球首間以性愛娃娃作為賣點嘅「Xdolls」，店內有多名負責招呼客人嘅性愛娃娃，佢哋亦各有名字，分別係Kim、Lily、Sophia等，佢哋嘅職責相信唔使多講，就係提供玩樂畀客人。如果想同佢哋嬉戲嘅話，揀選心水嘅性愛娃娃後，可以喺店內嘅3個特色房間揀選其中一間玩樂，收費每小時89歐元（約800港元），若然二人同行收費120歐元（約1,075港元）。可能有人會話：「乜法國唔係喺2016年時通過賣淫法咩？」賣淫喺法國屬違法行為，只係「Xdolls」所提供嘅服務啱啱喺灰色地帶，首先店內嘅「囡囡」係情趣玩具，其次該店提供嘅服務同共享單車嘅概念一樣。
不過「Xdolls」仍然引嚟唔少團體嘅抨擊，有女權團體認為呢種經營模式，同真人嘅色情場所一啲分別都冇，而法國高官Nicolas Bonner Oulaldj則表示，性愛娃娃貶低女性嘅形象，同時該店視為一種賣淫場所。話說回來，其實性愛娃娃都有男性版，唔知大家又點睇呢？
撰文：魂