愛情男女總是會想，雖然自己不是對方的第一個，但希望自己是對方的最後一個，只是所謂愛情，卻往往發生在錯誤的時間、錯誤的地點和錯誤的對象身上。最近討論區有名男網友表示，早前跟一位女同事到外地公幹，兩人身在異地兼因節省旅費關係而共住同一酒店房，結果乾柴遇上烈火，公幹多日便幹足咁多日。返港後，男網友相當回味旅途中的日子，可惜女同事其實是位人妻，對方亦表明自己志在偷食，着令男網友勿多想。男網友表示自己已墮入情網，無法自拔，究竟點算好呢？
脫種yy15：其實你個女同事之前有冇試過同其他男同事去公幹過？有嘅話咪八吓，睇吓其他男同事係咪都同佢有路，有，咪即係佢係淫娃，可以不理。如果冇嘅話，咁你就真係有機會喇！話晒晚晚同你搞幾劑，話真係冇感情真係講唔通！不過講到尾，都要睇吓對方撇唔撇甩到個老公。
呢種女人好複雜：呢啲女人唔要罷啦！佢有老公o架喇，都要出去搞搞震，證明佢有送綠帽嘅習慣，如果你唔想第二日無啦啦變綠帽男嘅話，咁你咪去追囉，冇嘢o架，追到咪開心囉，追唔到，咪轉工囉！
左右碌Bella：男人真係好鬼天真，個女人都話齋偷食冇感情，諗咁多做乜。其實我有足夠證據懷疑，其實係你好耐都冇啪啪啪過，家陣啪得盡情，咪想繼續保持呢種關係。問心，你係咪真係鍾意佢，鍾意嘅話，未公幹就已經追對方啦！
雷暴中擔傘：講真，想偷情使乜等到去外國，佢去得外國先至咁放縱，應該係同環境因素有好大關係，如果係咁嘅話，你試吓問佢想唔想同你再去外國「公幹」多一次，去嘅話，咪即係話你有機。
撰文：魂