有個人客，將近午夜上架步，輪到一個小姐上枱，小姐曰：「今晚我唔可以上陣，如果你要去開房，我介紹第二個姊妹來。」
人客曰：「點解？我個樣好得人驚？抑或以為我莫財？」
女曰：「我唔係咁嘅意思，上來玩嘅貴客又點會冇錢，如果平日，你唔去盡我都唔開心，拋個身出嚟做都係為咗賺錢，可惜今晚忽然有親戚來。」
人客不信曰：「真嘅？」
女曰：「點解唔真，你估我嫌錢腥咩？」
人客曰：「好極，埋大鐘入房。」
女曰：「我已經話咗你知，今晚唔可以交易。」
人客曰：「我知，總之冇問題啦。」
入房後，人客即曰：「即刻除褲畀我睇吓。」
女曰：「難道咁都有花假？」即刻除褲，驗明正身。
人客曰：「好極了。」然後取出兩張大牛，曰：「你同我將兩隻大牛擺喺你胯下一陣。」
女曰：「點解要咁做？」
人客曰：「你有所不知，今晚我在大檔輸咗好多錢，所以出來抖氣，轉吓運，剛啱遇到你親戚來，合晒合尺，我要用兩隻大牛再去博吓，今次必可以破大檔之煞氣。」
女曰：「係呀，一定破佢哋法，你一陣大捷而歸，記得返來同我慶功至得。」
人客曰：「當然，我識做。」取回兩張大牛，珍重放入袋中，然後離去。
原來呢個撈家，十分迷信，被大檔殺到一頸血，輸到七彩，此時袋住兩張製煉過之大牛，再到大檔。
撈家以一千元落注，一擊即中，信心十足，夾注，再勝，佢迷信大檔之煞氣已破，連夾五口，已經歸本贏凸盤幾，大檔換手派女將上陣，撈家即刻收手，返去架步將兩張對方騎過之大牛送予撈女。
夏灣拿
一九七六年四月八日