一晚，九點左右，有一處大檔，人客唔係幾多，巡場宣布，十五分鐘後收皮，盡地一煲，要賭就大口一啲，因為聽到消息，要洗太平地，於是賭仔就缸瓦船打老虎，盡地博一口。
果然，開埋呢口，巡場就叫各位得閒來玩過，此時，有一批人來握手，由攤官到打荷，都換晒人。
有個賭仔曰：「又話收皮？唔係吖，你哋換班而已。」
巡場曰：「換咗班之後，我都走，呢批夥計係上來做戲，你明未，人客都係支人工做戲者也，你想唔想支番份人工，扮吓臨記，每人五十。」
賭仔曰：「一陣有人來冚檔？」
巡場曰：「唔一定，甚有可能會來，你有興趣就博吓。」
賭仔曰：「我博，如果有事，是否擔保及罰款都歸公司負責？」
巡場曰：「當然啦，我哋照足行規，本來我哋已經搵夠人，現在世界唔好，要搵人做戲，一百個都有，但係阿哥係貴客，如果你想玩吓，我哋支多一份畀你又點話。」
於是，賭仔留低，望吓呢批荷官，賭徒幾乎全部係道友，個個仙風道骨。
原班人馬散晒之後，場內剩留十個八個道友扮賭徒，但佢哋行行企企而已，突然鈴聲大作，有人喝曰：「埋位，要真嘅一樣。」
原來天文台發現情報，撳鐘通知，不久，有一隊軍裝人員衝上來，又有魁斗。
有人問曰：「呢檔嘢邊個開？」
一個道友指鼻曰：「我係老細，又係主持人，兼埋總巡，呢班係我夥計，其餘係人客。」
於是，一隊鴨仔一樣，押晒落樓，上大車，警員亦將證物搬埋落嚟。
去到警署，問話，落案，巡場已經袋住銀紙來將各人擔保出外，有個道友曰：「我唔想擔保。」
巡場曰：「你就開胃，冇得傾。」
賭仔問曰：「點解佢唔想擔保，鐵籠好舒服？」
巡場曰：「唔想擔保，支雙薪者也。」
一九七四年十二月三十日
「魁斗」指外籍警察。「魁斗」一稱源起，就要從鍾馗講起。相傳鬼王鍾馗係魁星托世，而魁星則係位於北斗七星中嘅第四顆星，卻被坊間作品描繪成藍面赤髮鬼及眾鬼嘅頭領，於是當時嘅人就以「魁斗」嚟稱呼呢班外籍警察。另外將魁字嘅「鬼」同「斗」（當年頭字嘅坊間簡寫）拆開，便成為當時警際內對外籍警察嘅流行稱呼「鬼頭」嘞！