有間架步，被淡風吹到頂唔順，易手，新老闆上場，對撈女曰：「以前將近年尾就係淡月，因為人人都有急景殘年之印象，有家室之人，要留番多少過年，單身寡佬亦要換季做新衫，所以我哋呢行，淡到極，一定要等到各行業都出晒雙糧先至好景，但係今年，有資格出雙糧的商業機構及工廠，唔係幾多，唔執笠已經好彩，所以亦不能寄望咁高，非自己出橋不可。」
一個撈女曰：「有乜高橋，現在係淒涼，成晚長，有兩個嚟客坐吓已經上上大吉。」
老闆曰：「我呢條橋，係保衞人客嘅荷包的。」
撈女曰：「點解，如果個個人客嘅荷包都被保衞，嚴密封鎖，我哋豈不是瓜直？」
老闆曰：「唔係要人客封鎖荷包，而係要保衞人客嘅荷包，只畀我哋嘅小姐打開，而不准其他場嘅小姐摸亂。」
撈女曰：「啱，我哋獨食，但係又有乜辦法令到人客嘅荷包只為我哋打開？」
老闆曰：「所以我就提議用明碼實價方法，定出公價，直落搞掂幾多錢，辦法分開五級，第一，人客連氣埋兩個大鐘者，免費；第二，三十元搞掂；第三，五十元搞掂；第四，一百元先至搞掂；第五，冇得傾。現在，你哋各人向我報名，認為自己邊一級，我就編你哋入邊一級，以後對人客講明，人客見我哋咁爽，就不必盲摸，又不必同小姐討價還價咁傷感情，自然就樂於來我哋處散銀。」
過兩日，廿幾個女，個個都向老闆報晒自己之級數，老闆就向人客提供情報，使人客個個心中有數。
一個月後，老闆又召集廿幾個小姐，曰：「明碼實價之辦法，已經收效，我可以畀個貼士各位，明碼卅元之小姐最收得，五十元次之，反而捧兩個鐘奉送小姐唔係幾受歡迎，大概人客心理，認為傾唔埋嘅小姐，對一陣都嫌多，對兩個鐘可能會暈，至於收一百元嘅小姐，未發過市。」
全廳小姐，於是一律改為公價三十，老闆曰：「對啦，今勻你哋可以將人客碼住，第二間廳嘅小姐，想摸亂你哋嘅人客都唔得矣。」
果然，呢檔架步，生意做到好巴閉，叻晒。
一九七四年十二月二十二日
「瓜直」即係死亡嘅意思，中國人向來忌諱「死」呢個字，因此便會用其他字嚟取代。不過話說回來，點解「瓜」會同死扯上關係呢？據稱當年香港有唔少來自中國北方嘅人，佢哋會用「掛」嚟稱呼死亡，例如：那個人掛了，即係嗰個人死咗咁解。廣東話中嘅「瓜」同「掛」字嘅讀音差唔多，於是便出現呢種講法。