如果要數日本長壽十八禁題材嘅話，自1999年開始推出嘅「Baldr系列」絕對係其中一個，從系列初代作《Baldrhead～武裝金融外傳～》，到最新登場嘅最終章《Baldr Bringer》，足足橫跨18年。而嚟到最終章，作品貫徹系列特色，就係戀愛、育成加機械人戰鬥，當中嘅機械人戰鬥更係最大賣點，事關遊戲中嘅戰鬥以戰棋形式進行，有別一般純愛嘅十八禁遊戲，帶畀玩家戰略嘅快感。如果有玩開呢個系列嘅話，都知道每個系列作品都係新嘅劇情，而今次卻有啲特別，事關男主角係一個叫做「不二」嘅人造人。
故事一開始，不二嘅腦海浮現「唔快啲返到現實嘅話……」，跟住佢就醒咗，發現自己身處喺一間巨大房間內，同時有一位美少女瞓喺床上，突然房內響起警報「最終檢查完成，開始進入啟動準備。」美少女聞聲即刻起身，然後走到不二面前問：「你知道我係邊個嗎？」原來美少女有事想拜託不二幫忙，不二聞言後便答應對方，心諗：「可以保護到佢，太好喇！」美少女向不二解釋：「你嗰副身體係為咗運用「戰鬥用電子體」而誕生嘅疑似知性體，我係呢個世界嘅管理者厄莉絲，歡迎嚟到幻想世界Vetex！」就係咁樣不二開始伴隨厄莉絲戰鬥，而期間會遇到10個美少女。話時話，點解作為一個人造人，不二竟然會有男性生殖器官呢？佢又唔係用兵器嚟操控巨型機械人。
開發商：戲畫
售 價：￥9,800（約HK$676）
撰文：魂