呢個世界實在太多誘惑，令好多男女忍唔住背住另一半去偷食，之但係點樣先至算係偷食呢？早前英國有個調查就發現男人對於偷食行為嘅定義，同女人嘅睇法大不同，其實理由好簡單，皆因大部分男人都係花心。
英國婚介約會網站「Illicit Encounters」早前做咗個關於偷食行為嘅調查，訪問咗300名男士及300名女士，睇吓佢哋對於偷食行為嘅定義係乜，結果全部受訪男女都一致認為，另一半跟第三者發生性行為，就絕對係偷食！呢個結果相當合理，但係如果伴侶跟第三者接吻嘅話，又算唔算係偷食呢？有百分之八十八女受訪者認為接吻絕對係偷食行為，而受訪男性認同接吻係偷食嘅只有百分之二十八。至於言語上嘅調情，佢哋又點睇呢？結果有百分之四十嘅受訪女性表示係偷食行為，而認同嘅男士就只有百分之十四。若然跟異性跳貼身舞嘅話，有百分之二十一嘅受訪女性認同偷食，男士則只得百分之八認同。從呢3條問題，睇到男女對於偷食嘅睇法差別相當大，不過又唔係每個問題男女嘅睇法都大不同，好似對於跟異性握手、跟前度保持友好關係等，受訪男女嘅睇法都差唔多，兩者同樣有百分之十認為係出軌嘅表現。網站發言人Christian Grant表示雖然男人知道女人對偷食嘅定義跟自己唔同，但係佢哋仍然樂於游走灰色地帶，從中尋找樂趣。
Fashion嘅嘢你識條鐵咩！每次見到所謂名師設計嘅時裝，總係有種睇唔順眼嘅感覺，事關佢哋嘅設計，好多時都超出常人的接受能力，究竟呢啲時裝係走在潮流尖端，定係創造潮流呢？咁就要視乎閣下點睇喇！話說早前喺美國舉行嘅紐約時裝周，不但展示現今時裝嘅潮流，同時亦係時裝品牌推出「話題性」時裝嘅好機會，其中兩位嚟自德國嘅時裝設計師Nan Li同Emilia Pfohl，聯手推出以女性性徵為靈感嘅重口味時裝，極具話題性。呢兩位設計師一直以提倡兩性平權為設計宗旨，今次推出一系列以強調女性胸部同陰部嘅時裝，當中分別有超巨乳造型及凸顯陰部嘅服裝，仲有展出「鮑魚」髮夾同高踭鞋，雖然有部分作品嘅設計好誇張，但係當中亦不乏風格之作。據兩位時裝設計師稱，佢哋希望可以從穿着上改變大家對女性刻板嘅印象同定型觀念，支持兩性平權，而透過創造出一個健康嘅性文化，可以令大家欣賞到色情嘅狂野一面。講到好有理念，但係老土都要問句：「究竟呢啲時裝會唔會有人着出街呢？」
貪靚唔係女人嘅專利，男人亦同樣會追求美貌，甚至選擇去整容，嚟自克羅地亞嘅47歲男設計師兼演員Neven Ciganovic就係其中之一。為咗追求完美鼻形嘅佢，先後做咗3次整形手術，令個鼻變得挺拔，而嘴唇、下巴、胸肌、腹肌等地方亦進行過多達15次嘅整形手術。整咁多次嘅原因好簡單，佢話咁樣可以令自己更出名，成名後有更好嘅發展。整容上癮嘅佢，早前為咗應英國一間電視台拍攝關於佢整容嘅紀錄片，於是飛去伊朗再次進行整鼻手術，點知當佢返到屋企後，卻發現自己嘅兵器勃起兼一直軟唔番落嚟！原來係對麻醉藥反應不良關係，而患上「陰莖異常勃起」（Priapism）。所謂「陰莖異常勃起」，就係陰莖喺冇受到同性慾相關刺激嘅情況下，持續勃起超過4小時，而無法自然恢復疲軟狀態。如果唔及時處理嘅話，陰莖血管內嘅血液會形成血栓，導致勃起功能永久性障礙。Neven Ciganovic得悉事情嚴重性後，即時入醫院做手術，但係醫生同佢講兵器要完全恢復正常，仲要幾個月嘅時間。雖然佢整容上癮，經過呢件事後佢都覺得怕怕，表示唔再整容。
撰文：魂