吳雅熙熱度爆錶

美艷呢個形容詞大家聽得多,但係點樣先為之美艷呢?根據詞典解釋,美艷解做美好艷麗,咁講仍然有啲空泛。查實大家只要睇吓嚟自南韓嘅人氣模特兒吳雅熙,就會清楚明白美艷嘅真諦!

美艷動人

唔少人認為模特兒嘅必備條件,一定要有迷人嘅樣貌。不過想成為一位人氣模特兒,單憑呢一點係唔足夠,最重要係樣貌、身材同氣質兼備,先至可以獲得大家注意,尤其係喺南韓索女雲集嘅模特兒界中,更係缺一不可,而吳雅熙就有齊呢三個優點喇!不過原來中學時期嘅佢一啲都唔起眼,佢解釋話當時專注學業,所以唔注重自己嘅打扮,及至喺公州映像大學就讀時,才開始注意自己嘅儀容,而經過打扮後,阿妹真係靚到不得了,即時成為校內嘅焦點,加埋高挑及玲瓏浮凸嘅身材,可以話係魔鬼嘅化身。唔少人以為佢入讀映像大學,目的係希望進軍演藝界,不過咁諗就錯晒,事關佢最希望係從事編導工作。

但命運總係如此有趣,原本想朝向幕後發展嘅雅熙,卻意外地成為兼職攝影模特兒。老實講,阿妹擁有如此出眾外形,如果唔做模特兒嘅話,又真係嘥料!而佢好快就喺業界取得名氣,模特兒事務所覺得佢有潛質,及後安排佢喺車展中擔任車模,起初佢都有啲擔心自己做唔嚟,因為佢冇呢方面嘅經驗,結果憑住誘人外形及性感嘅車模制服,令佢成為車展上嘅焦點之一,加上新面孔帶嚟新鮮感,因此火速成為網絡紅人。

積極備戰

雖然初次演出相當成功,不過雅熙未有打算加入模特兒界全力發展,反而暫停工作專心讀書。大家都知模特兒係一碗青春飯,雖然話熟女模特兒同樣有相當市場,但若然能夠早啲入行,未來嘅發展空間會更加大,而雅熙卻選擇喺啱啱起步就停工,會唔會對模特兒事業帶嚟影響呢?佢解釋其實都有考慮過呢點,正因為明白模特兒生涯好短暫,若然冇一定嘅知識基礎,反而會限制咗自己日後嘅發展,事關冇人知道未來將會係點,於是佢決定先好好裝備自己,然後再決定未來嘅方向。經過兩年嘅深思熟慮後,佢發現仍然好喜歡模特兒工作,便下定決心以模特兒作為自己嘅事業,2013年正式成為全職模特兒,先後喺多個車展中亮相,同時亦變得更具女人味,迷倒一眾粉絲。喺車模界獲得相當人氣之後,雅熙便進軍賽車女郎界,先後喺世界一級方程式賽車南韓站、亞洲勒芒24小時耐力賽、南韓電單車錦標賽等賽事中登場,及後更成為賽車隊伍嘅專屬賽車女郎。

經常以性感誘人形象示人嘅雅熙,予人冰冷又高貴嘅感覺,但原來喺現實生活中,佢係一個活躍分子,尤其熱愛賽車添。佢笑稱每次企喺賽道時,都會幻想自己有日會成為賽車手,跟一眾高手喺賽場上競賽,而為咗達到呢個目標,家陣佢努力練好車技,希望有朝一日能以車手身份喺賽場上登場。

精彩推介

簡介:咪睇吳雅熙貌似一位冰山美人,查實佢性格相當好動,除咗鍾意賽車之外,仲鍾意滑水、跑步同跳舞,亦鍾意約埋一大班人一齊去玩餐飽。如果大家想了解佢多啲,就要Click入呢個網喇!

網址:http://cafe.daum.net/mingky90

吳雅熙Profile

出生地:公州市

身高:169cm

三圍:35、25、36

撰文:魂