高科技成人博覽大開眼界

各位巴絲打唔好意思,都係嗰句:「這些機會永遠不屬於你的!」除非你願意花兩舊扮買手入場睇,咁就可以攞正牌睇四仔同玩震蛋有幾爽喇!亞洲成人博覽舉辦咗咁多屆,話冇料到就假嘅,而今屆主打高科技成人玩具,令人大開眼界,依家就帶大家入場睇吓啦!

VR天下

個個都VR,唔通個個都想VR咩?咁講就唔通喇!未試過虛擬實境色情(Virtual Reality,VR)嘅朋友內心一定好想試,而爽過嘅巴打就玩到唔捨得放手,所以細佬可以好肯定咁話你聽,十個巴打買VR,十個都係為打J!繼上屆大力催谷中美日VR色情發展後,今屆更加係VR天下,連俄羅斯、澳洲、丹麥及波蘭等都加入戰團,開發不同特色嘅VR玩法。

今屆亞洲成人博覽有200家參展商,當中有3成參展商提供VR業務,反而情趣玩具,例如震蛋J杯、SM綑綁道具及情趣內衣頓變成配角,大家最關注始終係VR科技,亦由於要親身笠上頭玩先Feel到嗰份震撼,性急之情喺各個攤位隨處可見,有啲攤位更出現人龍排隊等睇VR鹹片,相當熱鬧!

講到吸引,莫過於連續兩年參展嘅中國代表BKK推出嘅「動感手帶2.0」,喺上屆呢款手帶已震驚歐美日市場,更同日本AV廠合作共同開發專用AV片,只需配合智能手帶即可與畫面中AV女優嘅動作同步,今屆再接再厲,手帶反應更敏感,更設有「同步高潮」按鈕,用家到頂時,女優即回敬超激高潮反應過你,現場測試堅興奮,假如配合埋女優嘅「名器」J杯玩,簡直同真人搞嘢無異!

至於「本地薑」方面,上年號稱「主動」及「被動」式齊發力嘅VIIA VR軟件開發商,今屆再踩場,不過佢今年玩「被動」,原來係因為用家懶到出汁,鍾意被囡囡服侍!

套套大革新

除咗玩高科技,傳統嘅成人玩具都有嘅!安全套同震蛋喺物料同包裝上作大革新,當中最矚目有全球首款「水膜套」,採用透明質酸取代硅油作潤滑成分,報稱在交歡過程中更保水、更順滑,而事後又更清爽,搞完唔使清洗都得o架!

另一個精彩產品,係堪稱地上最強高潮神器「自摸寶盒」,一盒有齊多款棒頭,仲可以大幅度上下伸縮、旋轉及震動,奪得德國設計工業獎,負責人表示連黑人男優都唔係佢對手咁話!女人床上咁多法寶,咁巴打咪好蝕底?放心,色情界至今依然係重男輕女,好似AI仿真人偶一定係男人至愛,佢識得眨眼、頸部可以左右扭動,仲會講嘢添,事關佢加入咗語音學習功能,聽從主人吩咐,玩家想點就點,將佢放喺電動台上仲可以前後左右移動,但目前尚未投產,各位等吓啦!

你我他齊參加

得細佬齋噏,係咪愈聽愈火滾先!唔使怕,明年大家都可以參加喇!主辦單位宣布明年4月5日至8日喺中環海濱活動空間舉辦名為「18+Central」嘉年華,為全港首個公眾成人展,為18歲或以上人士呈獻世界級舞台表演,精彩節目包括有成人用品介紹、內衣Catwalk騷、美容健康產品及美酒佳餚等,更邀請來自澳洲男團Badboys Australia現場表演,另外有鋼管舞及繩縛藝術。據主辦單位發言人表示,「18+Central」其實係一個十年之約,自舉辦亞洲成人博覽及亞洲娛樂博覽後,多年嚟都想策劃一個新奇大膽,同時又不失格調的大型成人嘉年華,目的係為成人展重新定義,打破成人展只以男性為主、賣弄色情嘅刻板印象,場地會以「潮」(Chic)及「野」(Wild)劃分為兩個區域,例如有全球知名「裸體」油畫藝術家Mr.Pricasso屆時會粉墨登場,絕對是性情中人打卡天堂,大家密切留意!

亞洲成人博覽

地點:香港會議展覽中心展覽廳

日期:8月31日

時間:10:00am~4:00pm

只對相關行業人士開放

預先登記:免費

現場登記:$200

網址:www.asiaadultexpo.com

撰文:祖