想成為男士心目中嘅女神，迷人樣貌固然重要，火辣身材同樣唔少得，尤其係喺一眾索爆模特兒之間突圍而出，樣貌及身材都係必不可少嘅條件。南韓模特兒金柳兒之所以能夠喺索女雲集嘅模特兒界跑出，因為佢兼具上述兩項要素嘅同時，加上自信心爆棚，故成功上位。
其實乜嘢叫做魔鬼身材？單靠三圍數字並唔能夠呈現出嗰種玲瓏浮凸嘅美感，如果想真正體會魔鬼身材嘅魅力，就要欣賞下呢位喺首爾出生嘅模特兒金柳兒。畢業於同德女子大學廣播系嘅佢，原名叫金允貞，當時佢係校內嘅風頭躉，事關佢擁有俏麗嘅樣貌，以及前凸後趷嘅身材，被男同學封為女神。亦因為佢外形出眾，故此佢經常喺校內活動擔任司儀，並且兼職做攝影模特兒。究竟佢嘅主持功力有幾好就唔知，只知道佢喺攝影界中薄有名氣，所以畢業之後有唔少模特兒公司向佢招手，但佢並未有打算喺模特兒界發展，因此拒絕咗對方嘅邀請，反而成為一個上班族。
不過多年嚟嘅模特兒工作，呢段經歷始終喺佢內心揮之不去，加上模特兒公司及朋友不停游說下，終於喺2014年正式成為全職模特兒。由於佢已經離開模特兒界已有一段日子，為咗重拾當年嘅狀態同工作感覺，故此初出道時主力做攝影模特兒。經過半年之後，即2015年佢以賽車女郎身份喺首爾舉辦嘅電單車比賽上登場，性感嘅賽車女郎服，不但展現出佢火辣嘅身段，尤其係低胸嘅設計，令激凸嘅上圍震撼攝影師嘅鏡頭，配合一雙修長美腿，成為賽場上最矚目嘅焦點。
金柳兒首次演出大型活動，能夠獲得如此成績，絕對係佢模特兒事業生涯上成功嘅第一步。及後其所屬模特兒事務所安排佢參加第4屆南韓賽車女郎大賽，起初佢對自己能否勝任抱有懷疑，經過深思熟慮後，佢決定去參賽。雖然佢今日回顧番當時嘅比賽過程時笑稱好輕鬆，但據事務所指，當時佢不但要接受訓練、應對傳媒及進行拍攝同宣傳活動，同時又唔可以放低模特兒工作，因此柳兒捱得好辛苦，試過匿喺事務所內大哭。雖然困難重重，但係佢仍然堅持要繼續參賽，憑住堅毅嘅努力，終於喺比賽中獲得最佳新進模特兒大獎，可以話之前嘅付出，終於得到回報。
柳兒表示經過參賽之後，令佢嘅性格出現極大嘅改變，佢坦言自己唔係咁受得苦，亦好容易會放棄，不過當時佢覺得既然決定咗以模特兒工作為未來發展路向，如果呢次唔去到盡嘅話，將來必定會有遺憾。結果佢發現原來自己咁有毅力，可以堅持到底。正正係呢種對自己嘅重新認識，令佢變得更加有自信，知道應該點樣展現自己嘅魅力。柳兒又話參賽後，仲有一個意想不到嘅得着，就係臉形輪廓更突出，原來佢出道之初，因為臉形有啲嬰兒肥而感到唔開心，而經過辛苦嘅比賽及工作後，不但身材纖瘦咗，連帶面部嘅線條都出晒嚟。至於柳兒有咩未來計畫？最近佢密謀朝住演藝界發展，相信大家好快會喺電視度見到佢嘅演出喇！
簡介：唔少人都認為金柳兒最令人着迷嘅地方，除咗俏麗嘅樣貌外，就係前凸後趷嘅火辣身材。其實除咗呢兩個要素外，一雙修長美腿亦係佢嘅天賦本錢。唔講唔知，原來佢曾經做過腿模，以一對美腿為唔少商品拍攝過平面廣告，足見佢對美腿同樣魔力十足。如果大家想了解佢多啲，就要Click入呢個網站喇！
網址：http://cafe.daum.net/kimryua
出生地：首爾
身高：172cm
三圍：36、24、34
撰文：魂