唔知係咪近年以超能力為主題嘅英雄及科幻片愈嚟愈多嘅關係，日本動漫不但經常以超能力作為主題，就連十八禁遊戲亦受到超能力風潮嘅影響，好似由NanaWind開發嘅最新遊戲《春音Alice＊Gram》就係其中之一。NanaWind憑住之前推出嘅作品《Alia's Carnival!》而獲得極佳嘅評價，因此呢套作品同樣備受關注，而佢亦貫徹美少女風格，實行將超能力、美少女及學園呢三個成人遊戲界嘅王道元素共冶一爐。
故事發生喺初春時節，位於海邊城市凑十區嘅成凌學園啱啱開始第3學期，呢間學校女生比男生多，係一間自主度極高嘅名校，因此學校由「學生會」及「新生會」兩個學員組織聯合管理。男主角瀨真楓太郎負責管理「黃昏部」，呢個部門嘅工作相當瑣碎，例如幫忙收取學員各種雜費、尋找失物、勸交、對付風紀組等等，楓太郎每日就係咁過住悠閒嘅日子，直到有日佢收到一封神秘來信，信上面寫住：「你有能力探明和解決即將同時發生嘅幾個問題嗎？」然後就有部直升機飛到學園，從此黃昏部就被捲入大量嘅麻煩事中，隨住超能力事件嘅出現，嚴重程度有不斷升高嘅可能，究竟楓太郎能否將所有秘密解開呢？呢點就要等玩家自己動腦筋喇！
開發商：NanaWind
售價：￥9,800（約HK$686）
發售日期：現已發售
撰文：魂