夏日水着童貞必殺

必殺再出發

大家仲記唔記得之前介紹過，喺日本紅到爆嘅「童貞必殺服」最新代表嘅毛織上衣呢？呢套毛衣至今喺日本仍然人氣極高，因此憑毛衣一炮而紅嘅廠商食住個勢，推出名為「童貞必殺服再生版」嘅變種泳衣，實行將男士嘅童貞一擊必殺！被日本網民稱為「即死」級嘅必殺泳衣，同原版必殺服差不多，都係側乳包唔晒及後開背嘅經典性感設計，不過心口部分開多個窿展露事業線，而下半身則成為連身嘅毛織泳褲，日本網站售價3,890日圓（約276港元）。據宣傳口號稱呢套泳衣雖然以毛織製成，卻採用最新超輕薄設計，唔會焗又舒服，但係着件毛衣落水，唔知仲游唔游到水？另外，廠方又稱呢套泳衣，最啱男友送畀女友做禮物，不過究竟有幾多男友會唔介意女友着呢件露出度極高嘅泳衣去游水呢？

ACG迷最愛

日本ACG迷最愛嘅泳衣，相信係學園風嘅競泳水着莫屬。雖然佢哋大愛競泳水着，但呢種泳衣嘅款式相當密實，因此唔少泳衣公司會喺競泳水着加上性感嘅鏤空，以增加露出度。不過講到當中最性感嘅，莫過於呢件喺日本有超人氣嘅變種競泳水着，售價3,200日圓（約227港元），沿用傳統嘅寶藍色，特別多嘅鏤空設計，點睇都唔似傳統競泳水着，反而似兩件頭泳衣多啲。據稱呢種超性感設計係糅合咗愉虐中嘅拘束概念，將泳衣設計成布帶咁款，着上身後好有綑綁Feel，而露出大半個屁股嘅泳褲，更係將男士嘅邪念推至最高峰。雖然佢顛覆競泳水着嘅設計，但係受到唔少ACG迷歡迎。

胸網一件頭

三點式嘅比堅尼泳衣，賣點在於露出度夠高，但係要性感唔一定要乜嘢都睇得清清楚楚，若隱若現更能勾起男人嘅邪念。好似呢件透視開胸一件頭泳衣，不但被日本網民稱為「童貞必殺水着」標誌性泳衣，更有日本漫畫家喺網絡分享穿着呢件泳衣嘅漫畫少女。呢件泳衣由日本內衣公司EROX設計，以「危險水泳時間」作為宣傳口號，唔單止外形相當性感，大開中門所露出嚟嘅乳溝，更係強烈刺激男士嘅視覺，而泳衣嘅物料經過精心挑選，絕對適合游泳穿着。唔少日本網民表示，如果喺泳池見到有索女咁着嘅話，童貞必定失守。現時只得藍色，售價4,104日圓（約291港元），唔知大家會唔會考慮送畀女友呢？

極小比堅尼

比堅尼一直咁有人氣，又點可能唔會成為日本男士眼中嘅「童貞必殺水着」呢？不過比堅尼有好多款，而喺日本人氣度最高嘅比堅尼，莫過於呢套由比堅尼公司BikinisTokyo推出嘅「極小」系列。顧名思義，佢最大嘅特色就係夠晒細件，啱啱好遮住3點。呢個系列有兩種款式，分別係傳統3點式同大V形連身比堅尼，各具特色，而且露出度極高，難怪人氣咁高啦！此外，可以將兩款比堅尼同時着上身，營造出唔同嘅感覺，備有多達23種顏色供選擇，總有一款合你心水。

童貞水着條件

日本網民有一套公認「童貞必殺水着」嘅標準，除咗要有大幅度展露肉體外，仲一定要大面積地見到心口同臀部，尤其係泳衣嘅正面，唔可以阻擋男士嘅視野。不過亦有人補充指，「童貞必殺水着」應該加入可以喚起童年回憶呢項，但係呢種睇法卻甚有爭議，因為日本網民覺得如果係咁嘅話，睇怕只有競泳水着先至可以入圍。

撰文：魂