正所謂「食色，性也」，好似呢隻由成人遊戲公司Unisonshift推出嘅新作《戀上你戀愛Recette》，就將美食同色情元素結合為一，為玩家帶嚟一段美味與鹽花共融嘅浪漫之旅。Unisonshift一向對蘿莉系萌妹情有獨鍾，大部分遊戲嘅女角色都係外形甜美可愛，加上佢一向大膽嘗試新題材，每次都能帶給人驚喜，好似呢個將美食加入成人遊戲中嘅題材，夠晒特別。故事發生喺一間名為六華星嘅私立學園，有個特別嘅校規，就係學生喺入學頭兩年都要選修特定課程，而鍾意食甜品嘅男主角二宮春馬，就選修咗甜品製造課程，期間佢認識咗4位各有特色嘅美女同學，透過美食嘅交流，男女之間嘅情愫慢慢燃起，令春馬陷於美少女嘅魅力而不能自拔，究竟佢最終會揀邊個做女友呢？玩家喺遊戲中可以盡情為女角色更換造型，同時又可以放任同女角色打情罵俏，而最過癮嘅就係遊戲中有海量嘅甜品，不但各有特色，更提供埋食譜，玩家有興趣嘅話可以跟住嚟做，係個非常有趣嘅十八禁戀愛作品。