所謂「JK業務」係一種游走於風俗界限嘅商業服務，理論上佢應該同色情服務一啲關係都冇，卻經常跟色情扯上關係。早前日本政府通過《JK營業禁止條例》從7月1日開始，禁止未滿18歲女高中生從事呢個行業。而呢個條例嘅通過，會否係「JK業務」嘅末路開始呢？
「JK業務」（JKビジネス或JK Business）中嘅「JK」其實係女高中生日語發音「Jyoshi（女子） Kousei（高生）」中第1個英文嘅簡稱，而「JK業務」係指女高中生參與嘅一種服務性商業活動，而活動類型相當多元化，但凡由女高中生提供服務嘅，都會被冠以JK之名。其實「JK業務」早喺2006年已經開始出現，佢同援助交際有極大唔同，前者係既讓男士們從年輕少女交流中，喚起青春嘅印記及心靈嘅慰藉，少女又可以得到金錢回報；後者則純粹肉慾同金錢上互取所需。
既然「JK業務」只係一種純粹精神上嘅交流，點解又會背上污名呢？咁就要從日本高中生嘅兼職文化開始講起。早喺上世紀70年代，日本有約兩成高中生做過兼職，直到2014年上升至7至8成。由於兼職文化普及關係，故此短工時又相對其他兼職高收入嘅「JK業務」，便吸引部分高中女生入職，不過佢哋心智未成熟，好易受有心人引誘而墮入援交陷阱。部分業界人士甚至會喺高中女生見工時，不經意提及「裏OP」（裏オプ），全名叫「裏Option」（裏オプション），意思近似潛規則，慫恿少女下海賺更多外快。為咗令佢哋樂於下海，甚至會設置人氣榜，令佢哋為爭取更好嘅「業績」，而提供色情服務。
1.JK Refresh
「JK Refresh」（JKリフレ）中嘅「Refresh」即係按摩嘅意思，顧名思義，「JK Refresh」店內嘅少女化身成按摩師，為客人提供按摩服務。一般做法，都係先讓新入行嘅囡囡跟熟手按摩師學習，然後就會上場提供服務。而所謂按摩只係噱頭嘢，故此客人唔會將佢哋同正規按摩店比較，至於價錢方面，以位於池袋嘅「JK Refresh」店「萌cast」為例，每40分鐘收費4,000日圓（約284港元）。由於服務都係喺獨立房間或以布簾作為間隔嘅地方進行，加上按摩過程中會有唔少身體接觸，因此呢類服務經常為人所詬病。
2.JK Cafe
「JK Cafe」（JKカフェ）又稱「JK喫茶」，係最常見嘅一種「JK業務」。正如佢嘅名字一樣，以同少女飲飲食食同傾偈作為賣點。至於經營類型有兩種，一種係好似一般咖啡店咁，客人入店後就會有少女坐埋嚟傾偈，而另一種則係設有獨立包廂，讓客人同少女喺冇人打擾嘅情況下隨心所欲咁傾談。前者因為係公共場所關係，所以基本上唔會出現「裏OP」，但係後者因為隱蔽度比較高，據聞有相關服務嘅店舖存在。
3.JK Tour
雖然唔少「JK業務」類型都好踩界，但其實唔係所有掛住「JK」兩字嘅店舖都係僱用女高中生，其中一種就係「JK Tour」（JK見学）。玩法係店內設有一間單向鏡房間，然後一班穿着高中校服嘅「偽JK」就會喺鏡嘅另一邊表演，表演套路一般先係日常活動，跟住就喺鏡前擘髀露低，甚至自娛一番。點解叫佢哋做「偽JK」呢？因為呢班囡囡已經過咗18歲，兼且畢咗業好耐。而事實上自「JK Tour」出現至今，警方都未曾發現有未成年少女喺度工作，不過日本警方仍視佢為「JK業務」類型之一，防患於未然。
4.JK散步
「JK散步」（JKお散步）絕對係「JK業務」類型中，最具爭議性嘅一種營運模式。正如佢字面嘅意思一樣，客人只需要預約，店方便會安排一名少女同客人約會，而部分「JK Refresh」店亦會提供「JK散步」嘅服務，收費係按時間計算，平均每小時10,000日圓（約710港元），另外行街期間所有消費由客人負責。不過，因為佢哋並非喺室內提供服務關係，故此店方嚴格嚟講只係擔當中介角色，如果囡囡同客人到情人旅館交易嘅話，店方可以將責任撇除得一乾二淨。另一方面，唔少研究都發現，「JK散步」其實係少女援交嘅最常用途徑，因而佢被視為色情嘅溫床。
由於「JK業務」相關嘅店舖經營手法愈嚟愈踩界，甚至成為援交嘅溫床關係，除咗日本警方屢次喺掃黃行動中，發現從事「JK業務」嘅未成年少女喺酒店提供色情服務外，經調查後發現，半數「JK業務」女生曾喺工作期間與客人發生性行為，故此處理「JK業務」問題嘅聲音一直唔少。
有見及此，愛知縣喺2015年2月提出縣內《青少年保護育成条例》修訂案，並喺同年7月1日喺縣內推行，成為全日本首個針對「JK業務」條例。其內容同《JK營業禁止條例》差唔多，當中規定全面禁止僱用18歲以下未成年人、實施實名制，並要求相關場所必須負起申報義務。不過《JK營業禁止條例》嘅罰則更重，違反條例者，處以1年以下有期徒刑及100萬日圓以下罰款。
唔少人都認為呢次日本政府大力規管「JK業務」，係因為東京奧運將至，想要改善日本色情國家嘅形象先至咁做。不過從《JK營業禁止條例》中嘅細則可以睇得出，日本政府只禁止未成年少女喺「JK業務」場所內工作，至於年滿18歲嘅「偽JK」卻並唔受限制，換言之「JK業務」場所只要唔係僱用未成年高中女生嘅話，係唔會受罰。雖然係咁，但日本社會對呢條法例能否起到保護少女作用，並唔樂觀，事關據調查發現，從事「JK業務」嘅少女多數係家境貧困或有家庭問題，為咗生活費及學費從事呢種職業，因此有保護兒童團體認為治本方法，應從根本問題入手。
撰文：魂