持久力十足嘅男人能夠滿足女性嘅需要，至於點樣可以令床戰更持久呢？其中一個秘訣就係深呼吸喇。要增強床上表現，當然要有好體魄，專家表示食開心果亦會有幫助。
有好多研究都指出，女性要喺床戰成功達到高潮，又或者感到滿足，除咗需要逾10分鐘前戲之外，抽送亦要逾10分鐘。呢個時間話長唔長，話短唔短，但係對於唔少男士嚟講可能係一個難題，因為佢哋可能只得幾分鐘貨仔，咁點算呀？唔通由得佢快快完事，事後仲要被女方取笑係「快槍手」？唔使驚！今日搵來呢方面嘅專家Clare Morrison博士同大家講吓增加持久力嘅秘訣。第一，如果喺抽送嘅時候感到就快要洩射，記住要停落嚟休息，咁要停幾耐呢？博士話最好係30秒至60秒，等到快感稍稍冷卻，然後再進行抽送。咁停低嘅時候可以做乜呢？博士話第二個秘訣就係喺呢段時間進行深呼吸；第三係分散注意力，博士建議男士們可以喺抽送期間諗其他嘢，簡單咁諗一個算術題亦可以達到目的；第四係使用厚度更高嘅安全套，可以降低敏感度，從而增加持久力。
男士們想喺床戰當中表現得龍精虎猛，需要花唔少工夫，最基本當然係作息定時，千祈唔好畀壓力自己啦！另外，仲有勤做運動鍛煉出良好體魄。至於飲食方面亦要注意，又煙又酒當然對性能力帶來負面影響，飲食營養不足亦會令人喺床上變成軟腳蟹，然而過度飲食亦一樣有壞影響，所以適量飲食及保持營養均衡至為重要。早前土耳其有一個研究搵嚟17位患有勃起功能障礙嘅男士協助，安排佢哋喺三星期入面食用100克開心果，結果發現佢哋嘅性生活有明顯改善。營養學專家Nigel Mitchell表示開心果含有「好膽固醇」可以促進心血管健康，大家都知道之所以能夠勃起都係靠充血啦！血管健康自然可以令勃起得更順暢更持久。另外，開心果含礦物質鋅，令男人體內嘅睾丸酮保持健康水平，對於床上表現有正面幫助。
撰文：賢