惡毒魔法少女

日本動漫有唔少魔法少女題材，當中嘅魔法少女固然係女主角，而佢哋性格必然係正派非常。不過日本成人遊戲公司VALKYRIA最新推出嘅作品《外道魔法少女鈴音～惡淫惡化～》卻反其道而行，當中嘅魔法少女心地極之惡毒，雖然唔知會唔會吸引到玩家，但講到新鮮感卻係滿分。故事講述女主角天道鈴音，既唔係學習型，亦非運動型，最重要係佢連人際關係亦唔擅長。平日佢總係寒住背，坐喺最冇人留意嘅角落，經常成為其他人欺凌嘅對象。不過正所謂「可憐嘅人必有可恨之處」，而呢句說話正正係鈴音嘅縮影，皆因呢位少女不但妒忌心極重，思想亦極端地自我中心。雖然佢唔識做人，性格亦相當黑暗，但喺眾人眼中嘅天使化身高野聖卻百般維護鈴音，仲對佢非常溫柔添！鈴音會就此被高野聖融化？錯！鈴音原來一直對高野聖嘅行為相當反感，更從心底討厭對方。某日，鈴音遇到一隻神秘生物，對方賦予魔法能力，希望佢能用魔法力量幫助有需要嘅人。不過鈴音又點會聽對方講，事關佢決定用魔法向所有人報復，首報復對象就係高野聖，究竟鈴音嘅行為會唔會將世界推向滅亡呢？