歌星開演唱會好多時都會請嘉賓上台表演，為演唱會增添娛樂性。雖然日本AV女優開騷就鮮有咁做，但早前喺東京上演嘅AV女優活動「LANTANA☆NIGHT vol.1」（簡稱LN）就唔同喇！原本只有包括友田彩也香嘅6位女優，無情情又多咗個女優出現，到底因乜解究？唔通有女優識得分身術？
今年首季，日本AV界已經有兩個頒獎典禮先後上演，一個係SkyPerfecTV成人放送大獎，另一個就係DMM成人大獎。兩個AV界盛事完結之後，大家要等到11月至可以見到AV OPEN開幕！大家如果心急想同AV女優見面，喺現世代嚟講絕對唔係難事，不妨多留意位於東京新宿嘅會所LEFKADA，此乃AV女優們活躍之地，好多派對活動都喺呢處舉行，剛喺4月有一個名為「LANTANA☆NIGHT vol.1」就順利喺LEFKADA完成，令一班AV迷大為滿足！LANTANA其實係女優事務所嘅名稱，而LN呢個活動當然係請出事務所旗下一班專屬女優娛樂大家啦！咁有咩女優呢？有潮吹女王友田彩也香、涼宮琴音、彩城優里菜、若月真里亞、西內琉奈及黃金麥，原本青山華都有份，但係阿妹因為身體不適故缺席其中，然而有呢6位活力十足又玩得狂野嘅女優出席，都已經睇頭十足啦！活動一開始，6位女優先祝酒預祝演出成功，兩杯到肚之後就展開勁舞比併！由友田彩也香、若月真里亞及黃金麥組成嘅友田組，與彩城優里菜、西內琉奈、涼宮琴音組成嘅彩城組大鬥舞藝。
兩組比舞嘅第一局，由若月真里亞對決涼宮琴音，二人扮米高積遜跳舞，但係舞藝只屬其次，搞笑成分居多。至於第二局則由黃金麥對上彩城優里菜，大家激烈扭動胴體，充滿火辣氣氛。到第三局就精彩喇，因為友田彩也香喺台上同西內琉奈比併之時，突然施展一招六七十年代大熱嘅的士高舞，搞到對手西內琉奈同觀眾先係睇到眼凸，繼而齊聲喝采，而彩也香跳到身水身汗當然有回報，就係獲得掌聲如雷，令友田組贏得舞藝比併！兩組鬥完跳舞功夫，再鬥床上功夫，兩組要輪流派成員出嚟鬥騎乘技巧，將計步器扣於褲頭之後，女優們就要出盡腳力、腰力、飲奶力喺限時之內扭扭扭！由於友田組嘅成員個個都腰力非凡，仲落力扭到幾乎甩褲，最終勝利亦由佢哋獲得。
友田組連勝兩回合，到第三回合玩「超級無敵大電視」，喺現場就冇電視螢光幕，只係由主持人喺女優背後舉起寫有不同字嘅紙牌，然後再由另一女優以動作提示同組隊友去估，而友田組亦技勝一籌，連贏三局！至於輸咗嘅彩城組就要接受懲罰，不過大家唔使擔心，懲罰只係要彩城組3位成員自拍鬼臉照再上載到twitter啫。比賽完畢，無論係玩遊戲嘅女優定係台下嘅觀眾都一樣覺得熱辣辣，若月真里亞以及涼宮琴音此時齊齊變身成為性感貓娘高歌一曲紓緩緊張氣氛。6位女優仲向觀眾大派「福利」，齊聲剝去恤衫，露出着住泳裝嘅姣好身段。不過，明明得6個女優演出，舞台又會突然多咗個女優，仲要同友田彩也香咁似樣？原來呢個係彩也香特別帶來現場同大家見面嘅仿製情趣娃娃！雖然個娃娃的確造得幾似彩也香，但相信大家同小弟一樣都係想要真人多啲囉！
撰文：賢