以往台灣嘅色情場所，好多時都會拜祭豬八戒（天蓬元帥）同狐仙，前者拜祭時，小姐要穿着性感，相傳咁先至可以獲得豬八戒庇佑。至於後者則據傳有媚惑男性嘅作用，若然加埋符咒嘅話，誘客功力會更大添！雖然近年拜祭豬八戒同狐仙嘅情況已愈嚟愈少，但仍有部分色情場所同小姐，仍然相信拜祭係有助生意變得更好。好似早前高雄新興警方突擊檢查當地一間養生美容店時，發現店內不但有拜祭狐仙，仲貼有符咒，而符咒上寫住「攝男人魂魄」嘅字樣。據被捕嘅27歲林姓小姐稱，美容院負責人拜狐仙同貼符咒嘅目的，係希望令生意變得更好，而佢自己亦坦承平時都有拜狐仙嘅習慣，目的係希望能夠吸引更多客人。雖然係咁，但林女同美容院負責人同時否認有提供色情服務，而警方喺現場亦搵唔到證據，證明美容店有提供色情服務。不過警方卻意外發現，林女原來係一宗欺詐案中嘅通緝犯，林女慨嘆仲未見到有效果，就已經引嚟警察上門，而自己仲因為被通緝而被帶返警署。