南韓嘅索模真係冇得輸，要靚樣有靚樣，要胸有胸，要長腿有長腿，難怪愈嚟愈多人Like。而講到兼具上述三個條件，同時性格及氣質都咁誘人嘅話，絕對不得不提今日介紹嘅主角車貞兒。
用內外兼備呢四個字嚟形容車貞兒，真係一啲都唔過分，事關阿妹擁有足以迷倒任何男性嘅美貌，而且身材高挑，一對修長美腿輕易吸引大家嘅眼球，最重要係佢身形玲瓏浮凸，試問如此出眾嘅外在條件，又點可能唔令男士成為佢嘅裙下之臣呢？難怪阿妹出道短短3年，就已經躍身成為炙手可熱嘅人氣模特兒。
畢業於明知專門大學音樂系嘅貞兒，擅長唱歌、彈鋼琴同跳舞，加上外形出眾，絕對有機會喺音樂界佔有一席位，不過當時佢仍然在學關係，故此未有打算咁快入行，反而喺一次偶然機會下，去咗模特兒公司面試兼職，就咁開始咗佢嘅模特兒事業，而佢首個工作就係擔任車展女郎，佢話初時有啲緊張，幸好以前有過演出經驗，所以未至於緊張到腳震，表現仲愈嚟愈淡定，結果成功吸引大家嘅目光。自從呢次演出之後，佢對模特兒工作產生濃厚嘅興趣，同時人氣火速攀升，不但喺電視節目中亮相，更參與MV拍攝，作多棲發展，證明佢幾咁有實力。
講完貞兒憑住優厚外在條件，而成功喺模特兒界冒起後，就要講吓佢內在方面有幾咁迷人，性格溫柔又有帶點調皮嘅佢，輕易融化男士嘅心，加上佢十分孝順又鍾意煮嘢食，絕對係一個好老婆！如果大家有留意佢嘅社交網站，就會發現佢經常上載同父母嘅合照，即使工作忙碌，但係貞兒都必定會抽時間陪伴父母，咁有孝心嘅靚女，試問男人點會唔鍾意吖！講到鍾意煮嘢食，原來係因為佢對食物相當挑剔，為咗令自己食得開懷，所以佢會親自下廚，炮製出啱自己口味嘅美食。而另一個令佢享受入廚樂嘅原因，係因為喺佢眼中，合格嘅女性必定要識得煮嘢食，咁先至可以令未來老公感受到家庭溫暖。如此貼心又迷人嘅索女，絕對稱得上係入得廚房又出得廳堂，難怪佢咁受歡迎啦！雖然貞兒喺大家嘅心目中係如此完美，但原來佢一直被一個問題所困擾，就係佢屬於易肥體質，剛投身模特兒行列時，身形帶點肉地，為咗Keep Fit，佢每日都會勤力做運動，唔使節食減肥，阿妹話否則就享受唔到美食喇！
簡介：車貞兒名副其實係內外兼備嘅人氣女神，唔單止擁有迷人嘅外形，性格更係相當討好，尤其係佢咁有孝心，能夠娶到佢做老婆真係賺咗。大家想了解阿妹多啲，就要Click上佢嘅IG，有好多靚相睇之外，仲可以知道佢嘅工作同生活情況。
網址：https://www.instagram.com/cha_jung_a/
出生地：首爾
身高：172cm
三圍：35、24、35
撰文：魂