有研究指出男士們每個月洩射一定次數，患上前列腺癌嘅風險會降低，而專家有一個建議幫助男士唔使進行連場激戰咁費時費力。不潔係拍拖大忌，唔知男士邊一方面出現不潔情況，會令女士唔想上床呢？另外，原來好多女仔寧願食嘢多過上床，點解呢？
相信大部分男士都有自娛習慣，而呢個習慣利多於弊，唔信？睇吓以下嘅研究結果喇！早前哈佛醫學院進行一項大型研究，發現40至49歲嘅男士如果能夠每月洩射21次的話，咁佢哋患上前列腺癌嘅機會率就會比每月只洩射4至7次嘅男士低22%。不過，如果以每晚爆發一次嚟計，即係要同女伴喺一個月內做足21晚，未必個個女伴都有咁嘅閒情逸致陪你癲，故有男士們選擇自娛亦不難理解。之但係，性學專家Debby Herbenick表示好多男人其實係畀女伴管住，女方一旦發現男方有自娛習慣就會黑面，如果知道男方睇住四仔嚟自娛，厭惡感更加強烈！專家建議男人想慳番啲體力唔做愛，又想保持適量洩射次數，可以同女伴好好溝通，嚟個「互相安慰」，一來可以達到目的，二來仲為房事帶來新玩法，一舉兩得！
所謂人靠衣裝，出嚟社會工作，一身整潔而又合適嘅打扮相當重要，至於溝女方面，除非閣下係富二代，否則執靚個Look亦係其中一個成功關鍵。不過靚嘅定義又唔使一定由頭到腳都係名牌，總之乾乾淨淨就得啦！老實講，即使女仔本身未必乾淨得去邊，但係佢哋對於男性嘅整潔感覺就要求好高！早前，日本媒體《夕刊Spa!》進行一項調查，訪問咗好多日本OL，睇吓男人邊一樣污糟嘅隨身物品會令佢哋失性趣。結果顯示，最多受訪女性忍受唔到男仔嘅手機套污糟，因為手機係現代人最重要嘅貼身物品，如果手機套污糟的話，代表機主都唔會乾淨得去邊；第二位係耳機，至於第三位係銀包，有受訪者表示，男方嘅銀包又殘又舊，睇落好寒酸，仲會覺得男方連換個新淨銀包都冇錢。嘩！冇錢喎！咁就唔使發展落去啦！
為博紅顏開心，好多男人都着力增強性能力，希望以強勁嘅床上表現令女伴傾心又開心！之不過，咁諗法實在捉錯用神，因為要令女伴開心其實好簡單，只要帶佢哋去一間裝潢華麗嘅餐廳食好嘢，就已經令佢哋眉開眼笑喇！事實上，喺食同性之間，有唔少女性會選擇前者！早前英國有一項調查訪問咗12,000位成年男女，了解佢哋喺食與性之間會作出邊樣選擇，男士方面，有26%會選擇享用美食多於做愛，換言之大部分男士都鍾意做愛多啲，結果都幾正常吖！至於女性方面，有58%鍾意享用美食而唔選擇做愛！負責調查嘅Nicole Prause博士表示，對於大部分女性嚟講，做愛就等同交功課，有多餘體力嘅時候當然願意做愛，體力唔夠時就會耍手擰頭。而現代女性好多都工作繁重，運動量不足，加上聲稱要減肥節食，故多數都會覺得體力不足且容易疲勞，所以女士們寧願選擇食亦不難理解。
撰文：賢