唔少人鍾意重口味，早前有調查發現有接近三分之一人鍾意玩SM！無論男士們喜歡飲咩果汁，都一定要飲杯紅菜頭汁，因為有助增強床上表現。好多研究結果都顯示單靠抽送唔一定可以令女伴獲得高潮，咁男士們從邊一方面入手好呢？
小弟曾經睇過一本講述禪理嘅書，提及到一念天堂，一念地獄嘅道理，作者表示佢每次感覺到痛楚就唔會當係痛苦，而係覺得呢種係「痛樂」。痛楚又何樂之有呢？作者解釋話身體受傷當然少不了痛楚，但係你當佢係苦就梗係令自己覺得淒涼，如果倒轉嚟諗，認為痛楚證明到自己的確係有血有肉曾經存在於世，自然覺得無傷大雅，甚至覺得係樂趣喇。早前，外國有一個研究發現，有三分之一人喜愛玩SM，哈佛大學心理學家Justin Lehmiller表示當中有三個原因，第一係唔少痛楚感覺都同快慰感覺一樣令大腦釋放出同類分泌以及透過相同神經元去傳遞，所以玩SM時感受到嘅痛楚被當係快感。第二係根據巴甫洛夫理論（The Pavlovian Theory），一個性慾高漲嘅人容易尋找更另類嘅性刺激，相信好多鍾意玩SM嘅人成日覺得慾火焚身。第三係根據腦重疊理論（The Brain-Overlap Theory），掌管性器官嘅大腦區域同掌管雙腿嘅區域相鄰，令好多男人見到美腿就會產生性衝動，所以就解釋到點解有人鍾意玩腳仔擦槍又或畀女人用高跟鞋踐踏喇。
男人喺床上令女伴飽受快感衝擊，要出盡九牛二虎之力，有時夠力仲未必得喎！因為好多研究都顯示出猛烈抽送唔一定可以令女方達到高潮，所以男士們應該要學習更多性技巧，亦要同女伴多溝通。性技巧著作《Come As You Are: The Surprising New Science That Will Transform Your Sex Life》嘅作者Emily Nagoski話畀大家知，女士身體有3個部分需要男士刺激，第一係耳仔，可以親吻、輕咬又或者輕撫呢個部位，令女方喺生理上及心理上都同樣感受到刺激。第二係玉手，相信大家都有聽過足底按摩，手部一樣好敏感，喺前戲嘅時候細心又溫柔咁為女仔按摩一下玉手，令佢哋覺得有安全感及性慾增強。第三係腹部，女仔小腹對溫度相當敏感，男士們不妨輕吻以及輕撫女伴嘅小腹，將溫暖同愛意由小腹傳到女伴嘅三角地帶。
男士們認為做男人一定要雄赳赳，氣昂昂，飲得蔬果汁多可能會導致體質虛寒，所以唔會成日飲，但係可以話畀大家知，有研究顯示西瓜汁有壯陽功效，除此之外，紅菜頭汁同樣有助增強「性」能量。生育專家Marisa Peer話紅菜頭含有豐富嘅食用性硝酸鹽，男士們攝取足夠分量之後可以達到提升性趣嘅效果。硝酸鹽有擴張血管作用，能夠令血液更容易流到命根，一柱擎天。另外，紅菜頭含有唔少對人體有益嘅維他命及礦物質，例如當中嘅硼有增強活力嘅作用。當然，紅菜頭雖然對男士有如此效果，但係飲用需要適量，否則影響身體健康就適得其反喇。
撰文：賢