天要下雨，娘要嫁人，最近喺日本寫真界傳出一單喜事，但係好多寫真迷都當係傷心事，因為美貌絕色、身材高挑婀娜嘅超級美人杉本有美宣告已經嫁咗人！之不過，傷心只係一瞬間，因為杉本有美表示就算係嫁咗人亦會繼續拍寫真，實在太好喇！
針無兩頭利，喺美女如雲嘅日本寫真界亦係一樣，好多擁有美貌嘅女優都唔多好身材，而好身材嘅女優又未必係靚女，就算又靚又好身材，又係咪真係靚到可以堪稱為絕世美女就真係見仁見智喇！但係喺小弟以及好多寫真迷心目中，就有一位兼備絕色美貌與一等一身材嘅極品美人，佢就係杉本有美喇！年方27歲嘅有美韻味濃同時又不失青春，五官標致迷人，氣質足以迷倒眾生，稱之為芳華絕代亦唔過分，即使係日本藝能界女星亦難以喺美貌上勝過有美，就算美貌贏得到有美，再計埋身材亦一定會輸！事關有美身材高挑婀娜，5呎7吋身高配上34C-23-34三圍，再加埋白滑緊緻嘅極品美肌，塵世間要搵到多一個同佢一樣集眾多優秀條件於一身嘅女仔，真係好難。
杉本有美天生麗質，可能係同家族遺傳有關，據講其父及兄長身高都有成6呎咁高，而阿媽以及其外家成員平均都有5呎7吋，照咁睇有美算係家族當中身材最「嬌小」嘅一員喎。有美十多年前已經出身做模特兒，曾參加選美活動《Pichi Lemon 2002年第1次讀者模特兒競賽》獲得亞軍，自此有美備受關注，後來加入寫真界亦成功爭取相當高嘅人氣。除咗拍寫真，有美近年亦開始歌手生涯，當然，有美人氣高又靚女，甚受影視界歡迎，拍戲亦係有美嘅主要工作，當中最出名嘅一定係拍特攝片集《炎神戰隊轟音者》飾演銀戰士一角啦！另外，有美亦主演過唔少電影，星途一片光明，粉絲們有好多機會可以睇到有美華麗登場。不過，喺上個月有美宣告已經成為人妻，下嫁一位年紀畀佢細4歲嘅白領階級！消息震驚寫真界同藝能界，一班粉絲更加心傷，仲好驚有美從此收山，幸好有美表示有老公唔代表唔使做，老公對於有美行性感路線亦冇意見，所以結咗婚一樣可以拍水着寫真，大家都鬆一口氣！
簡介：杉本有美近期除咗喺Twitter繼續上載自己嘅愛貓照片，仲上載唔少與親友幼兒嘅合照，顯示出一副母愛氾濫嘅樣子，唔通有美好快就做媽媽？
網址：https://twitter.com/yumi_sgmt_4biz?lang=ja
年齡：27歲
身高：5呎7吋
三圍：34C-23-34
撰文：賢