今時今日健身練大隻已經唔再係男士們嘅專利，好多女仔為咗塑造完美體態以及強壯體魄都會去健身，甚至會練出一副肌肉型身材不讓大隻佬專美。不過大家唔好以為練到變成大隻妹就冇晒美感喎，今日為大家介紹嘅才木玲佳就大隻得嚟又誘人喇！
曾幾何時小弟以自己矮小嘅身材為恥，不過諗吓諗吓，我哋偉大嘅國家領導人鄧伯伯身材都唔高，曾經叱咤風雲嘅拿破崙一樣係知名嘅矮仔，咪一樣可以成就大業！好似才木玲佳呢位新紮日本寫真偶像咁，一樣生得細粒，但係佢依然可以喺寫真界發放迷人魅力，喺擂台上更加成為女摔角手們嘅勁敵！
24歲嘅才木玲佳樣子精靈又嬌俏，一睇就知性格相當鬼靈精，成日都鍾意氹人歡喜喇。身材方面，根據資料顯示玲佳身高僅得4呎11吋，但佢喺訪問中自爆實情係矮過呢個高度。其實，女仔細細粒反而更加可愛，但係玲佳就唔係幾鍾意，為咗令自己睇落強悍啲，努力健身並且練到一身肌肉，令身材有肌肉感同時亦不失線條美，睇落更有吸引力。
才木玲佳畢業於慶應義塾大學之後，就成為格鬥團體WRESTLE-1嘅專屬偶像團隊「Cheer 1」成員，開頭都諗住以美少女偶像嘅身份活躍於舞台又唱又跳就算，不過到咗2015年玲佳為Krush格鬥大會擔任舉牌女郎，由遙望擂台變成踏足擂台，仲開始對格鬥產生興趣。後來玲佳以客串性質參加K-1擂台挑戰，變身成為女摔角手上陣，之後索性入讀職業摔角專門學校學習摔角技巧同理論，畢業後以摔角手身份進行擂台挑戰，不過都有繼續做少女偶像，同一時間仲展開寫真工作添！喺擂台上玲佳表現甚佳，絕招包括駱駝式固定鎖、將對手成個抬起嘅Backbreaker以及起雙飛，即係跳起嚟個雙飛腿！除咗格鬥技了得，玲佳仲相當有學識，曾為BLEA 女子高等學校做過國語及日本史講師，亦因為咁玲佳有「筋肉才女」嘅稱號。
簡介：從才木玲佳嘅博客當中，可以發現阿妹對健身以及格鬥興趣濃厚，與阿妹興趣相同嘅朋友不妨Click上去同阿妹交流一下，亦可以欣賞阿妹嘅性感照。
網址：http://ameblo.jp/saikireika0519/
年齡：24歲
身高：4呎11吋
三圍：33-23-33
撰文：賢