「狂人」當選美國總統對世界有乜影響？細佬識條鐵咩，即使身為美國公民嘅脫星都未必答到啦！但其實口出狂言又豈止老特一個，當日嗌晒咪話如果「阿侵」當選就會搬離美國嘅女神Dani Daniels，細佬「目及」實佢嘅社交網，似乎仲未有動靜，莫非佢要搞埋個藝術展覽先肯走？
好心大家唔好淨係追住老特吹水唔抹嘴啦，查實好多男女都係咁，講就天下無敵，做就無能為力，四仔脫星都係吹水唔抹嘴「口架」！好似早前Dani Daniels接受網站「askmen」訪問時，親口話如果「阿侵」當選就會搬去歐洲，仲話好欣賞法國文藝氣息，適合佢發展藝術事業喎！咁家陣老特真係成功當選，唔知Dani係咪搵緊地方搬呢？睇怕Dani都係吹水囉！睇番由美國時間大選日開始，Dani妹嘅社交網完全冇關心過大選結果，而打後一個禮拜，阿妹不談政治只談風月，繼續每晚出入夜場做騷，同先前極度關心選舉嘅態度完全唔同晒，所以相信Dani純粹借題發揮，抽大選水，選舉完咗，咪繼續做脫星囉！
咁講真，就算Dani妹堅搬離美國大家都唔使太擔心，事實上，過去幾年阿妹都係歐美兩邊走，佢嘅四仔出貨量非常平均，每個月至少有三套新片推出，另一方面，佢集中喺網上發功，個人網站玩收費視頻，同時出走多個國家拍寫真兼遊埠一雞兩味，咁所以，Dani身處喺邊度對四仔迷都冇乜大影響，唯一影響係減少夜場做騷囉！之但係，Dani未來係咪繼續做脫星又另一回事，近年佢經常以Kira Lee之名喺藝術界打滾，除咗喺社交網大晒畫作畀人Like外，早前佢喺紐約開個人畫展，搞得有聲有色，而Dani所畫嘅畫叫Pointillism，中文叫「點畫」，原來佢學畫畫已超過十年，佢喺網站嘅個人簡介第一句已交代做脫星為交學費，到今日開埋個人畫展，呢點又冇吹水喎！所以阿妹想逐步淡出四仔界係不爭事實，話唔定過埋下年初嘅頒獎禮，連四仔都唔再拍，況且阿妹過去一年，不論做導演或脫星都係以「部頭」形式合作，冇同任何一間片廠簽死約，真係話走就走o架！講到尾無非都係錢作怪啫，如果Dani喺嚟緊嘅頒獎禮有大獎攞，留喺脫星界嘅機會率大增，冇獎攞嘅話，咪得閒出嚟砌兩鑊賺外快囉，上晒神枱嘅脫星條路都係咁行o架啦！
撰文：祖