有啲成人漫畫家之所以成名，主因係創作題材變化多；但亦有啲人氣漫畫家，雖然只專注於單一題材，卻憑此大獲好評。除咗歸功於劇情豐富同情慾誘人之外，畫技及想像力亦屬重要因素。日本成漫家足尾勝仁嘅人氣作品《Illusion Girls》，正係集這些元素於一身。
早喺2000年左右，足尾勝仁以「時原勝仁」之名活躍於成漫同人界。佢嘅畫風相當易認，皆因女角色個個都擁有大眼、巨乳同肌肉感身材，尤其喺豐滿嘅臀部及大腿，更係重點描繪部位。喺情慾場面方面，佢着重各種汁液同汗水效果，突出床戰時嘅激烈程度。另一招牌係每個成漫故事總會同奇幻題材有關，因而有奇幻成人向漫畫家之稱。經過多年浸淫，令佢嘅畫功相當紮實，加上少有嘅成漫幻想類題材，令佢2004年獲得喺成漫月刊《COMIC MUJIN》發表作品嘅機會，並且喺2006年4月推出首本單行本作品《Game Holic》。
憑着出色嘅奇幻故事，足尾勝仁成功喺成漫界彈起，翌年仲獲得出名對畫功有高要求嘅成漫月刊《COMIC UNREAL》邀請連載作品。為方便自己區分喺《COMIC MUJIN》同《COMIC UNREAL》連載嘅作品，2008年開始以足尾勝仁之名於前者發表作品，後者則沿用舊名。同年佢推出第2本單行本《PINKS LINKS》，2010年推出第3本單行本《大腦之棺 背德的半女神》，同樣好評如潮，而其後嘅《DREAM CHANNEL》同《Illusion Girls》更被視為代表作。
2011年10月推出嘅單行本《Illusion Girls》，收錄咗喺成漫月刊《COMIC MUJIN》刊載過嘅作品，分別有《Vampire Girl night》第1話至第3話、《Redstrings》、《Roomless Love》、《Change the Heart》同《Flower Road》前及後篇。書中收錄咗5個故事，每個故事背後都同一位神秘少女有關，之但係佢係邊個？要到去年6月發表嘅單行本《D-Medal》先至搵到答案。講到書中最令人印象深刻嘅故事，非《Vampire Girl night》同《Redstrings》莫屬。
《Vampire Girl night》嘅男主角野中，每晚都會夢到同一位衣着性感嘅神秘少女交歡，當對方喺高潮一刻，總會嗌出高宗呢個野中喺中學時嘅暱稱。夢醒後嘅高宗苦思呢位神秘少女，卻點諗都一無印象。呢晚佢繼續同神秘少女喺夢中曳曳時，對方卻透露出身份嘅線索。喺好奇心驅使下，高宗決定尋訪神秘少女嘅真身，只係佢點都諗唔到，呢段夢中情緣竟然同多年前嘅一件事有關。
《Redstrings》嘅女主角小楓，暗戀青梅竹馬嘅好友絢介雖久，但一直唔敢同對方表白。唔知從幾時開始，小楓發現自己擁有睇到月老紅線嘅能力，而絢介嘅紅線竟然唔係同自己連埋一齊，對佢造成極大打擊。失意嘅佢喺雨中亂逛，呢個時候絢介拎住把雨傘走埋嚟，話要同小楓返屋企。渾身濕透嘅小楓喺房間內跟絢介表白，同時講出紅線嘅秘密。絢介聞言指自己唔信命運，然後將小楓推倒在床上，究竟絪緣係咪事在人為呢？
漫畫名稱：《Illusion Girls》
作者：足尾勝仁
出版：MUJIN COMIC
頁數：212頁
撰文：魂