男女關係易聚易散，如果想維持與伴侶嘅關係，切忌喺床上犯下一啲錯誤。相信唔少人都會參與聯誼活動，借機識女仔，咁邊種衣着打扮嘅女仔最能夠令男人心動呢？各處鄉村各處例，每個國家都有自己最受歡迎嘅體位，一陣就話畀大家知。
男女感情關係好脆弱，早前英國新聞網站「Daily Star」搵來專家分析男人最容易喺床上犯嘅錯誤，而每一個錯誤都足以令彼此間嘅親密關係受到破壞。第一個係男人容易覺得冇氣氛、情緒達唔到興奮狀態就打退堂鼓，專家話咁就錯晒！因為咁做嘅時候，一來令女方失落，二來女方下次亦覺得「冇Mood」又唔同你做，造成惡性循環。第二係「當愛已成習慣」，切忌將性事以特定規律、日子、時間去進行，令性事變成例行公事，咁好快就會悶。第三係將伴侶同以前嘅女友床上表現作比較，因為冇女人希望自己比其他女人表現為差。第四就係麻煩大家喺完事後都要努力保持清醒，對抗睡魔，同女伴傾吓心事，咁樣有助女方有更長時間保持興奮情緒，亦令對方更有安全感。
小弟出嚟社會做事之後，發覺時間愈來愈唔見使，每日都營營役役，唔好講話溝女，有時連想見吓班兄弟都未必有時間。是以，小弟時不時都會叫班兄弟一係唔搞，一搞就要搞個有女仔參與嘅聯誼活動，一來唔會成班佬咁寡，二來小弟可以用溝女為藉口去請假，老細見我單身咁耐、孤苦伶仃咗咁多年，冇理由唔畀我放假啩！其實有好多男人都鍾意呢類有女溝嘅聯誼活動，喺日本就更加常見。早前日本網站「Menjoy!」搵來500名成年男性進行街頭訪問，了解一下喺聯誼活動中最能夠引起男士性趣嘅女性打扮，結果第一位係白色純潔嘅服飾，有男士表示每次見到女仔着到成身白色，都會覺得佢哋好純品、未經世故，最惹起佢哋嘅性趣。第二位係格仔裙，予人整潔乾淨感覺，興趣當然會大增。第三位係平平無奇嘅辦公室女郎套裝，點解呢？受訪男士覺得呢類女仔一定生活枯燥，好渴望尋求刺激，骨子裏充滿激情喎！
每個國家嘅人民都有自己嘅生活習慣，喺飲食習慣方面，中國人鍾意食飯、飲老火湯，美國人鍾意食漢堡包、鋸扒，日本人就鍾意食壽司、拉麵。而喺性行為方面，每個國家嘅人民亦有其獨特習慣。早前外國有一個大型調查訪問咗多個國家嘅男女，以了解當地人民最鍾意用邊一種體位交歡，結果澳洲最鍾意用趴低後進式，即係女方趴喺床上，男方就成個人瞓晒上去「活動」；英國人則鍾意簡簡單單嘅狗仔式；波蘭人就鍾意用一招叫做The Galloping Horse，即係男方坐喺櫈上，女方就面向男方坐喺上面；而巴西人最鍾意挑戰難度，所用嘅招數名為The Amazon，男方瞓喺床上雙腿屈曲向天抬起，女方則坐喺男方大腿內側騎乘，相當考驗男方雙腿同腰骨嘅承受能力！
撰文：賢