美國一個研究發現女仔比男仔更加容易一腳踏幾船，原因係基因作祟。想享受暢快嘅房事，需要性慾同性能力互相配合，不過男士們就要小心，因為屋企存在唔少會減弱性趣嘅用品。好多女士去到四五十歲，就會覺得自己嘅美色開始衰落，吸引力下降，因而令上床嘅性趣大減，不過情況喺日本就剛好相反。
小弟曾經拍過好多次散拖，最後同對方關係無疾而終嘅原因，通常都只得一個，就係發現女方除咗同我一齊之外，身邊仲有其他男仔，換言之我只不過係佢其中一個觀音兵。其實呢啲事喺現代社會好平常，有專家表示喺原始時代，女性就已經鍾意咁做。美國德克薩斯大學嘅教授David Buss早前進行過一系列研究，了解到女性比男性更容易出軌！咁講並唔係冇根據亂吹水，教授話喺原始時代開始，女性處於較為脆弱同被動嘅狀態，為咗令自己更加安全，通常都會喺一段關係以外再搵多個異性，一來愈多異性保護愈安全，二來收兵之後可以將之充當後備男伴。另外，早前美國賓漢頓大學做過研究亦有發現，男女如果擁有一種名為DRD4嘅基因，發生一夜情以及出軌嘅機率亦較高。當然，人類貴為萬物之靈進化到今時今日，好應該學懂如何控制本能，認真對待一段感情關係，唔應該搞三搞四！
近年好多女仔都迷上玩煮飯仔，包括小弟心儀已久嘅女神亦一樣，佢仲話好鍾意廚藝出色嘅男仔添！而小弟最鍾意煮嘢食，唔單止讀過西廚課程，仲真係做過西廚，真係開正我嗰瓣。相信各位男士為咗取悅女伴，亦相當樂於鑽研廚藝，更加會同女伴一齊玩吓煮飯仔，不過，男士們認真要小心，因為丹麥有研究發現，廚房當中唔少用具都含有全氟碳化合物（PFCs），由於呢種物質具有防油、防水功能，常用於製造易潔鑊，以及可放入微波爐叮嘅牛油爆谷包裝盒等。而PFCs被男士吸入體內之後，就會令精子數量減少。大家可能會話：精子數量咁多，減少少唔緊要啦！問題係性慾亦會同時下降，因為PFCs會影響埋體內嘅賀爾蒙分泌，連愛都唔想做，令男士冇晒性趣。
早前有唔少日本嘅調查顯示，當地男女都處於無性生活，唔少拍拖或結婚一段日子嘅男女都冇興趣上床，難怪日本嘅出生率持續多年陷於低迷狀態喇。不過，做愛係雙方嘅事，男女去到無性狀態又到底係邊一方出現問題呢？係男士唔想做，定係女方提唔起性趣呢？大家可以參考一下以下呢個調查嘅結果。調查訪問咗300名成年日本女性，問及佢哋若然變成熟到唔熟嘅熟女，屆時佢哋想要一段點樣嘅感情關係？有40.3%受訪女性表示有一段得閒可以錫錫嘅戀情就足夠，有23.7%則表示想要一段性同愛平衡嘅關係，而有25%就希望發展一段雙方必定有性愛嘅關係。調查負責人表示結果反映出，女性喺上咗年紀之後依然保持性慾，換之言無性生活嘅成因有機會係男方喺床上唔掂或者性趣缺乏所致。
撰文：賢