雖說女兒十八無醜婦，又有云十八歲卜卜脆，但係小弟一直覺得欣賞女仔，最好就喺佢哋二十出頭嘅時候，點解？呢個時候青春氣息濃郁，同時女性韻味漸漸散發，而胴體則鮮嫩兼彈手。若各位想體驗一下，咁就要推介日本寫真妹妹山中真由美及大貫彩香嘅演出喇！
日本好多寫真妹出道嘅時候都好年輕，未夠十八歲就拍寫真嘅大有人在，寫真迷陪住佢哋成長，由妹妹仔變得亭亭玉立，睇住佢哋女人味愈益濃厚卻又唔會生厭。好似23歲嘅山中真由美，喺2005年同妹妹山中知惠以童星身份演出電視節目，同時仲開始寫真生涯，即係話真由美12歲就開始拍寫真，不過講吸睛梗係佢成年後嘅作品啦！真由美嘅氣質比妹妹成熟，但青春活潑感覺仍在，佢嘅身材則豐滿得嚟具彈性，一對純天然E奶亦係賣點之一。
唔講唔覺，真由美最近推出嘅寫真映像作品《全部あげる》已經係佢嘅第45隻寫真碟喇！今次真由美去泰國取景拍攝，將當地嘅度假感覺，配合阿妹甜美又具治愈感嘅面孔、肉感十足嘅胴體，以及露出度甚高嘅打扮，引爆強勁治愈能量撫慰大家嘅身心，實在「泰」和味喇！
碟名：《全部あげる》
收錄時間：105分鐘
售價：約HK$303.3
日本嘅彈珠機店開到成行成市，大家如果去到日本各大城市，每每可見彈珠機店裝修到五光十色，仲有個大屏幕賣廣告吸引路人注意。由於幫襯彈珠機店嘅通常都係麻甩佬，為咗吸客，好多店舖都會搵索女代言，而要搵又索又有名氣嘅靚女，當然要從寫真界入手啦！天后級嘅杉原杏璃、今野杏南都曾經拍過唔少相關廣告，最近就輪到大貫彩香。芳齡23歲嘅大貫彩香五官標致迷人，從其精靈又滿含春色嘅眼神中，可以睇得出佢活力十足！大貫彩香身材小巧而不失豐滿感，D-CUP美乳及飽滿圓潤嘅美尻極具彈性！唔知係咪因為阿妹咁有彈性，故得彈珠機店賞識呢？
想感受彩香嘅彈性胴體，當然要從其寫真作品入手，寫真DVD《オオヌキサヤカ！！》就係彩香嘅最新作品。喺作品當中，彩香嘅打扮極多變化，有競賽水着、性感三點式、OL裝，仲扮埋《新世紀福音戰士》中嘅明日香。不同扮相嘅彩香展現出不同誘惑感覺，同時更賣弄飽滿嘅美尻，「股」惑人心。
碟名：《オオヌキサヤカ！！》
收錄時間：80分鐘
售價：約HK$303.3
撰文：賢