戰神散發出嚟嘅氣叫鬥氣，王者則發出霸氣，咁女神散發出嘅氣又叫做乜呢？咪就係仙氣囉！仙氣呢樣嘢真係好虛幻，卻令人難以抗拒，如果想體驗呢種獨特氣質，可以從內地模特兒空靈惑身上感受到呢股動人仙氣。
嚟自廣州嘅空靈惑，同時擁有小靈同萌菁菁Baby兔嘅外號。正所謂人如其名，佢絕對襯得上呢幾個名字，樣貌萌得嚟又可愛，相當討人歡喜，其身上更散發出一種獨特氣質，呢股氣質既非楚楚可憐，又非鄰家女孩嘅味道，而係一種源自於女神至有嘅魅力，令佢不論着乜嘢衫及咩造型，都會令人產生保護佢嘅衝動。佢除咗係寫真模特兒，亦係一位職業Cosplayer，憑住天賦嘅迷人外表，無論扮演乜嘢動漫角色，都萌得令人心動。
早喺佢投身Cosplayer行列及寫真界之前，原來係網絡偶像女團MissLike嘅實習生，經過專業訓練，喺鏡頭前表現得自然又淡定。除此之外，佢嘅音樂造詣亦值得留意，畢業於武漢音樂學院嘅佢，對音樂有深入認識，唱功了得，唔知幾時可以欣賞到佢嘅歌聲呢？
要成為一位專業模特兒，固然要知道自己嘅長處喺邊，而要成為一位專業嘅Cosplayer不但要具備上述條件，更加對動漫文化有深入認識至得，否則一定扮演唔到角色嘅神髓。不過呢個問題絕對唔會喺阿妹嘅身上出現，事關鍾情日本動漫嘅佢，對日本宅文化相當了解，加上佢對日本歷史文化有深入研究，所以佢拍攝出嚟嘅寫真，無論造型及甫士都充滿日本風格，好似早前佢扮演Pikachu，憑住萌爆嘅外形引爆人氣。
講到佢另一個最大嘅興趣，相信非食嘢莫屬，雖然佢嘅工作忙得交關，既要拍寫真，又要出席各個動漫節及表演，但係佢仍然會抽時間去品嘗美食，從牛扒到甜品，全部都係佢嘅至愛。而佢會喺微博分享美食照之餘，同時向粉絲介紹喺邊度享受到呢啲美食，夠晒貼心。
簡介： 空靈惑雖然仙氣過人，但卻並非生人勿近，反而予人熱情嘅感覺，最鍾意同粉絲互動。如果大家想知道佢嘅最近動向，例如會喺邊度現身，想野生捕獲阿妹嘅話，就要緊貼佢嘅微博喇。
網址： http://www.weibo.com/u/1791125121?is_hot=1
出生地：廣州
身高：160cm
三圍：30、22、32
撰文：魂