以前唔少人覺得性感迷人嘅模特兒，同埋動漫Cosplayer兩者大纜都扯唔埋，事關前者要努力突出自己，而後者則要求呈現出動漫角色嘅魅力，只係對於李琳琳嚟講完全冇難度，既能喺寫真同模特兒工作中展現出風采，又能夠凸顯出動漫角色嘅萌味。
嚟自北京嘅23歲李琳琳，英文名Lia，暱稱素衣。出道已有一段日子及演出經驗豐富嘅琳琳，最大魅力唔單止係玲瓏浮凸嘅身材，以及高挑身形，仲有一對水汪汪又精靈嘅大眼睛，難怪粉絲畀呢雙具Watt數嘅電眼迷倒。事實上，佢初出道時已經備受注目，憑住火辣身材同埋陽光味道，為寫真界帶嚟清新感覺，故此自佢出道以嚟嘅發展相當順利，並且火速向其他領域進發，除咗推出寫真外，佢先後以車模身份喺各大型車展登場，又喺各類型嘅金融展銷會、樓盤展銷會、服裝博覽會等商業活動中擔任推廣模特兒，佢亦經常喺各類型嘅平面媒體以性感模特兒身份亮相。除此之外，對話劇抱有濃厚興趣嘅佢，經常參與話劇演出，絕對係一位睇得又演得嘅陽光美女。
唔講唔知，琳琳係一位職業Cosplayer，大家喺動漫展或者ACG產品上見到佢嘅性感身影時，千祈唔好感到驚訝。不過有別佢喺寫真中嘅形象，作為一位專業Cosplayer嘅佢，以展現出動漫人物神髓為目的，配合天生嘅萌味，縱然佢所演繹嘅動漫角色，有啲係冷艷，有啲係火辣，同樣維妙維肖。如果覺得呢啲只限於外在嘅形容嘅話，仲有一點相信可以打動大家嘅心，就係佢廚藝了得，烹調海鮮更係拿手。雖然佢自稱平日極少下廚，但憑住對烹調嘅天分，輕易將食材化為美味。唔知係咪因為佢識飲識食關係，所以佢經常喺個人微博訴苦，指自己嘅體形愈嚟愈肥，仲經常勉勵自己要努力減肥添！不過睇番佢嘅寫真，發現佢一啲都唔肥，身材弗到漏！講到愛情觀，佢表示：「愛對了是愛情，愛錯了是青春。」敢愛敢恨，如此個性叫人如何不愛？
出生地：北京
身高：170cm
三圍：34、25、37
簡介：琳琳嘅寫真固然吸引，尤其係佢玲瓏浮凸嘅身材，更係叫人眼前一亮，而化身成動漫角色嘅佢，同樣性感得嚟又萌味十足，可愛度滿分。不過任憑佢嘅造型有幾咁令人一見難忘，都及唔上一雙精靈大眼叫人印象深刻。如果想了解佢多啲，就要Click入佢嘅微博。
網址：http://www.weibo.com/u/1786053643?is_hot=1
撰文：魂